Пичгу ёнатылг’ыйикыӈ Карагинский районык Камчаткакен майӈыг’ытвэ еетикынин вэтгыйиг’этыӈӄо Владивостокыӈӄо

Пичгу ёнатылг’ыйикыӈ Карагинский районык Камчаткакен майӈыг’ытвэ еетикынин вэтгыйиг’этыӈӄо Владивостокыӈӄо

03.08.2021 07:32:47 (GMT+12)

Пичгу ёнатылг’ыйикыӈ Карагинский районык Камчаткакен майӈыг’ытвэ еетикынин вэтгыйиг’этыӈӄо Владивостокыӈӄо
В’отэныӈӄо нэентэг’итвэнӈынэв’ вэлатгиӈо пичгин то социальный велиткоёлӄылэн Оссорак, Ӄораӈыник, Тымлатык то Ивашкак.

Лайвыма Карагинский районык, В. Солодов йитг’этвылӈэти омакаӈ юнэтылг’ык айгытӄынымъёлгык, меӈиныйик натвынав’ яноткенав’ аӄайпыгиӈо.

Ӈынвыӄ эняччыгиӈо келлаӈ ынаныӈ валг’о районык то наяӈвоӈнав’ омакаӈ яныплэпав’ӈык. Янотыӈ юнэтылг’э Оссорак, Тымлатык, Ӄораӈыник то Ивашкак натвын транспортакен этгиӈын, энаев’латгиӈо аӈӄатайнэпыӈ.

Инэллэчг’ын крайик иви, эмет нэлэг’ун танвэтгыӈгиӈын миӈкые йиплэпавык аӄайпыгиӈын.

«30 ӄайчейпыйиг’илгык Окский таг’ытвыӈванык Нижегородский областяк нэентэкъенӈын мемлэлыӈ г’ытвынаӄо меӈин йинэйив’лэтикынин имы яӄ инэӈэю ниччиг’эв’ ёг’ылг’этыӈ районэтыӈ, тэӄын Карагинский. Ынин инэӈэйёчгын китыӈ 750 тоннав’. В’отэныӈӄо эмэлкэ яӈволаӈ инэйив’лжтыӄ вэтгыйиг’эта Оссорайтыӈ Влаливостокыӈӄо, то яӈволаӈ ив’тылытвэтык вэлатгиӈо имы яӄэпыӈ, ымыӈ пичгин. Ӄэтэнгэвэӈӄо яӈвоӈ вэтатык тайкыён тит ныг’итикынэв’ пылв’ынтыв’эннятгиӈо инэйив’лэтык пичгу то янотыӈ явалг’о вэлиткоёв’»,- эвыӈ В. Солодов.

Ватӄэн эняччыгиӈын ёнатылг’ыйикыӈ айгытӄыӈӄал китыӈ - нымэлӄин итернет.

Инэллэчг’ын крайик иви, тайкыёлӄылэпыӈ В. Путинын пылиткома 2023 гэвэгиӈын Оссорак йиг’уевыӈ нынг’ыӄин Интернет.Эчги эмет нэкуплиткуӈнэв’ танвэтгыӈгиӈо, то ыннин вэтгиӈын наяӈвоӈын в’утин гивик. Ӄутин нымъёлгыкъет явэтгыльг’аллаӈ тит ныг’итикынэв’ субсидияв’ интернетэн тит йинив’тылэтвэтык вэлатгиӈо.
Опта йитг’атвылӈыма танвэтгыӈлай ынныӈийтыгиӈыкъет ымоӈ г’оямтав’элг’ыйикыӈ , меӈию уйӈэ иткэ айгытӄываято.

«Тит йиплэпавык в’уччин эняччыгиӈын, гыммо тыв’аняватык Росрыболовствайтыӈ, тит этолг’о то ӄонпыӈ юнэтылг’у айгытӄыӈӄал опта наг’ынныӈийтикынав’ ынаныӈ айгытӄываятык. Тыкивыӈ, ыннин китыӈ нымэлӄин этгиӈын ымоӈ ёнатылг’ыйикыӈ айгытӄыӈӄал»,- иви инэллэчг’ын крайик.

В. Солодов то инэллэчг’у крайик лавылай Карагинский районыӈӄо. Инэллэчг’ын крайик йитг’этвылӈэти омакаӈ юнэтылг’ык, ёг’ынэн социальный вано то гитэнин ыннытэпичгыӈиччету.

В’уткекьйит панэнатвылай эначгыпавылг’о инэллэчг’ин то Инэллэиччетин Камчатский крайик.

Эняннимэв’нэн С. Тынанто.