Энангыеватгиӈык «Явытгый Дальний Востоккэн» Камчатката енгыйивэнӈынин ныв’тэлгийӄэн энергетикан то енлыг’уӈэв’ӈынин йинны ӈаен «Луноход 1»

Энангыеватгиӈык «Явытгый Дальний Востоккэн» Камчатката енгыйивэнӈынин ныв’тэлгийӄэн энергетикан то енлыг’уӈэв’ӈынин йинны ӈаен «Луноход 1»

02.08.2021 07:37:07 (GMT+12)

Энангыеватгиӈык «Явытгый Дальний Востоккэн» Камчатката енгыйивэнӈынин ныв’тэлгийӄэн энергетикан то енлыг’уӈэв’ӈынин йинны ӈаен «Луноход 1»
Камчатский края енгыйивэнӈынин выставкак «Явытгый Дальний Востоккэн», меӈин йитыӈ 2-7 льгичейпыйиг’илгык VI Восточный экономикакен майӈыумэкэтык Владивостокык чининкинэв’ энанлыг’огиӈо. Йинтоӈвавылг’о ваставкан- Майӈыиччет Росконгресс в’эннятыӈӄо иччетин в’иннетылг’ин Президентан РФ Дальневосточный федеральный округык.

«Ӄэкмититики Камчатка»- ныннылг’атгиӈ то этгиӈын инэнгыйивэтванэн. В’утку нэенлыг’уӈэв’ӈынэв’ пыттоӈо краен: туристический, наукакенав’ этгиӈо,экономикакенав’ то г’уемтэв’илг’ин катгогиӈо, то ымыӈ умкылв’ыно, нучельӄын тит нымэлг’эв’ ыччу гыннитык.

«Камчатский край китыӈ вано, миӈки нанг’ынгычголавэкэ туризмакен вэтгиӈын. В’уткые эмэлкэ ёккы пылв’ынто, тит нымэлг’эв ныг’итики туризм. Камчатка пав’чиӈу нэкулӈыӈын Ымроссияк то тумнутэк. Ӈыеӄэв’кин ыннинг’ан валг’ын нучельӄин уйӈэ миӈки атвака. Эчги накоӈвоӈнав’ йинвэтатавык тайкыёлӄыло, тит йиныплэпавык имы яӄэпыӈ туризмакенав’ этгиӈо Камчаткак. Тыкивыӈ, эв’ынчам ямкалаӈ ынниг’ан валг’о тайкыёв’»,- эвыӈ инингив’ инэллэчг’ин Инэллэиччетык Российский Федерациях ДФО Ю. Трутнев.

Энанлыг’ов’ваны нэкутэйкыӈын тэӄын ипичепӈытонаӈ ипиӈэйин- ымыӈ микнэк ыннин гыйив’ӄэв’ Камчаткакен лиги нэкулӈыӈын.

Гынунчыку еллайкэ тайкыёлӄыло регионэн : тэйкылг’ын Ымваятэн вагалыны, тэйкылг’ын газовый ваны, туризмакэн ваны «Ӈыёӄ ипиӈэю», опта экологиякэнав’ тайкыёв’ яйтаӈык биологический амалваӈ валг’о этгиӈо то наукакэнав’ вэтгиӈо- миӈкые лиги нэкуелыӈнэв’ имы ею крайик, вэтгиӈо научный иччетин.

«Янотыӈ нэкуенг’уевэнӈын инвестиционный малгиӈын Камчатский краен. Мыткотгымаллаӈ мальмыкыӈ йингыйивэтык туризмакэнав’ тайкыёв’, наукакэнав’ то энергетикакэнав’. Мыткоянг’ояв’лаӈын мыкпылв’ынтылг’ыйикыӈ ымыӈ бизнесыӈ, эмэлкэ регионык ӈывок нытуйӄинэв’ тайкыёлӄыло. Инэллэиччетэ крайик ев’иннетикынин, ӈаеё мекив’ коявэталлаӈ Камчаткак то накоёӈвоӈнав’ пылв’ынто йиплэпавык Камчатка»,- иви инэллэчг’ын Камчатский крайик В. Солодов.

В’уткекьйит панэнатвылай эначгыпавылг’о инэллэчг’ин то Инэллэиччетин Камчатский крайик.

Эняннимэв’нэн С. Тынанто.