В. Солодов енг’элыӈ янотычг’о калик «Ыннэн валг’ын Россиян» эняечегиӈык Законодательный омакатынвыӈ Камчатский крайик

В. Солодов енг’элыӈ янотычг’о калик «Ыннэн валг’ын Россиян» эняечегиӈык Законодательный омакатынвыӈ Камчатский крайик

21.06.2021 08:56:07 (GMT+12)

В. Солодов енг’элыӈ янотычг’о калик «Ыннэн валг’ын Россиян» эняечегиӈык Законодательный омакатынвыӈ Камчатский крайик
Иччетэ Генсоветэн «Ыннэн валг’ын Россия» натвыгаг’ын янотычг’ын калэӈӄо «Ыннэн валг’ын Россия» Камчатский крайик кандидатуран инэллэчг’ин В. Солодовын. Инэллэчг’э крайик ив’нин ӄайлём, мыев’ ынкыӈ китыӈ чымачгиӈын омакаӈ вэтатык.

«Омакаӈ юнэтылг’ык мынг’ытанвэтгыӈлайкэ экмитылг’у тайкыёв’, тит лымало нанг’ылӈылайкымоё ымыӈ Камчатский крайик то Муйик майӈынутэк»,-иви инэллэчг’ын крайик.

«Владимир Путин в’аняванма съездак иви, «Ыннэн валг’а Россия» мычв’ыно кулӈыӈнин ӈаеё, меӈию нытгымг’ав’ ковэталаӈ. Гэвэгиӈын явалэтыӈ гыммо тынг’элык инэллэчг’у Камчатский крайик, то эчги эмет тычоччымавык итык янотычг’о партийный калик. Эняеченвэтыӈ ныг’элык инэллэчг’у крайик, чинин тылӄытык, в’уткекьйит ыннин акметгиӈын итти гымкыӈ ниччыӄин, тит лэккы эняеченвэтыӈ партияӈӄо «Ыннэн валг’ын Россия». То эв’ынчам тыкивыӈ, гымнинэв’ чаткаёӈгиӈо келлаӈ- в’утку йингыйивэтык чининкинэв’ гайматгиӈо в’иннетык ёнатылг’ыйикыӈ партияӈӄо «Ыннэн валг’ын Россия». В’утку котвалаӈ г’уемтэв’илг’у гамга социальный эччатыӈӄо, меӈию коёналаӈ опта ыявак айгытӄыӈӄал Камчаткак. Партиякэн келлаӈ нымейиӈӄинэв’ чаӈг’ачаӈгиӈо, миӈкые коёналаӈ крайик то ею в’утку кенӈыволаӈ. Ынкекъйит эчги в’аняватэ съездак Президент. Мынг’ываломэкынав’ г’уемтэв’илг’у, мальӄонпыӈ тэйкык йитг’атвылӈыгиӈо. Ӄонпыӈ лэйвык гамгав’ойвыӈӄо, ёг’ык ымыӈ ыявак айгытӄыӈӄал валг’о нымъёлго, тит лиги лыӈык ёнатгиӈо. Кытаван омакаӈ танвэтгыӈкы экмитылг’у тайкыёлӄыло, тит ваята лымало нанг’ылӈылайкымоё»,- эвыӈ инэллэчг’ын регионык.

Эняннимэв’нэн С. Тынанто.
Дни рождения в этом месяце
Парламентская ассоциация «Дальний Восток и Забайкалье»