Камчаткак омакальг’анма Законодательный умэкэтык мэлу нэлӈын в’аняватгиӈо вэтгиӈыкъет Инэллэиччетин 2020 гэвэгиӈык

Камчаткак омакальг’анма Законодательный умэкэтык мэлу нэлӈын в’аняватгиӈо вэтгиӈыкъет Инэллэиччетин 2020 гэвэгиӈык

19.06.2021 09:10:31 (GMT+12)

Камчаткак омакальг’анма Законодательный умэкэтык мэлу нэлӈын в’аняватгиӈо вэтгиӈыкъет Инэллэиччетин 2020 гэвэгиӈык
48 умэкэтык тыӈивылг’ин ваятэн Законодательный умэкэтык напаломтэлын то мэлу нэлӈыгэг’ын в’аняватгиӈын инэллэчг’ин В. Солодовын вэтгиӈыкъет Инэллэиччетин крайик 2020 гэвэгиӈык. В’уткекьйит эвыӈ инингив’ инэллэчг’ин краевой Законодательный умэкэтык А. Копылов.

Ынно иви, ваняватгиӈын инэллэчг’ин итти нымейиӈӄин то нымэлӄин. «Аӄачыг’ычгиӈын энячче ӄымек гамга энангыеватгиӈык экономикан, ынняӄ уйӈэ энвилкэ эллай вэтгиӈо.

Амъел вэталлай, тит йинтыватык социальный вано национальный тайкыёлыӈӄо- яяв’, кыннятав’ъяв’, спортакенав’ вано. Наныплэпав’нав’ то нэтэйкынэв’ нытуйӄинэв’ йиг’это. Котгамалаӈ яёг’ыӈкы тайкыёлӄыло ынныӈийтыгиӈыкэнав’ то тэпичигыӈкинэв’. Нантоӈванав’ социальный тайкыёв’, ымыӈ тит ёнатылг’ыйикыӈ ныг’итикынэв’ нымэлӄинэв’ то ниӈвилӄинэв’ ынныпичгу»,- эвыӈ А. Копылов.

Ынно опта эвыӈ, чоччымав’ма тэйкык калив’в’и вэтгиӈыкъет, инэллэчг’ын йитг’этвылӈэти омакаӈ гамга тыӈивылг’ык ваятэн итылг’у амалваӈ валг’ык фракцияк.

«Ымоӈ йинтыватылг’ыӈӄо пыӈлойпыӈ тыӈивылг’э ваята , инэллэчг’ын панэнатвэ, то опта тывынэн миӈкые валг’о Яноткенав’ вэтгиӈо еллайкэ Инэллэчг’ин крайик ӄолэнэтыӈ»,- эвыӈ А. Копылов.

Эняннимэв’нэн С. Тынанто.
Дни рождения в этом месяце
Парламентская ассоциация «Дальний Восток и Забайкалье»