Эчгыпо Камчаткакенав’ чав’чываеличг’энаӈ 13.04.2021 г.

Эчгыпо Камчаткакенав’ чав’чываеличг’энаӈ 13.04.2021 г.

13.04.2021 08:44:28 (GMT+12)

Эчгыпо Камчаткакенав’ чав’чываеличг’энаӈ 13.04.2021 г.
Йинчоччымавык тэнмо, тит ӈывок вакцинацияв’ ыявак валг’ык районык, йилнин тайкыёлӄыл эналлачг’ыӈ краевой энанмалав’ъэччатыӈ В. Солодовынак. Опта эвыӈ, тит гымлэ нанг’ыӈвонав’ еӈальг’атгиӈо инэнмэлэв’ъиччэтэ. Ынниг’ан валг’о тайкыёв’ губернатора йилнин омакальг’анма инэллэиччетык.

«Камчаткайтыӈ нэетын вакцинан «ЭпиВакКорона» меӈин эмэлкэ йив’лык титэ кенӈыволаӈ +2 +8, тыкивыӈ, ныг’ынчоччымав’латкы лайвыгиӈо ыявак валг’этыӈ в’ойвэтыӈ тэйкытӄивынвэтыӈ вакцинацияв’. То эмэлкэ ныг’итики яӈъя итылг’ын еӈальг’атгиӈын вертолётэн, тит тэйкык вакцинацияв’ ыяваӈӄал районык крайик. В’утин вэтатвытгыйик эмэт гаплиткоӈвота йинчоччымавык тэнмо омакаӈ инэллэчг’ык районык, тит ӄутин неделяк мынг’ытанвэтгыӈлан то мынг’ыакмелан ыннин тэнмытэн»,- иви В. Солодов,

Этг’у тайкыён йилнин эналлаэччатыӈ энанмалав’гиӈэпыӈ крайик - тит гымлэ ныг’ыӈвонав’ йиӈэльг’этык инэнмэлэв’ъиччету ыявак валг’этыӈ районык.

«Галаг’ыгэвэгиӈык аӄачыг’ычгиӈыкъет, ыннею вэтгиӈо уйӈэ этэйкыкэ мытынтынэв’. Инмы ӈынвыӄ в’аӈлагиӈо келлаӈ, мыев’ коӄлалаӈ энанмалавылг’ыйикыӈ. Тыкивыӈ, в’утин гивик йимкавык еӈальг’атгиӈо. Инэллэчг’э энанмалав’гиӈэпыӈ то йиплэпав’гиӈэпыӈ Корякский округ нэнг’ынг’уевэнэв’ тэнмо- титэ яӈволаӈ вэтатык иччету».- эвыӈ В. Солодов.

*

Йинчоччымавык паёч валг’о инэгэю увикив’ вийиӈык, тит атг’ылӈывока аӄачыг’ычгиӈа, йилнин тайкыёв’ В. Солодовынак в’аняванма умэкэтык краевой Инэллэиччетык. Инмы коплэпавыӈ этгиӈын, тит амкатка ныг’итикынэв’ тыг’ыллыг’у аӄачыг’ычгиӈа Covid-19 крайик. Эв’ынчам ымыӈ ею  ныг’итикынэв’ тит йинмэлэвэтык, ӈэвэӄ йиг’ояв’лайкэ тыг’ыллыг’у, ымыӈ тит лекарстваӈ эӄлэткэ.

«Янотыӈ йинчоччымавык инэгэю ымыӈ яӄэпыӈ, тит увикив’ нанг’ывийиӈикынав’, то эӄлэткэ энальпенӈыӈ малав’ъяк то ныг’ытвайкынав’ аптекак. То ӄутин неделяк ӄынгыевалагаткы энайилӈатгиӈо тит эӄлэткэ итык, ӈэвэӄ енӈывоӈ нытуйӄин тыг’ылгиӈын аӄачыг’ычгиӈа. Инмы мыткомычв’ыналлаӈ, тит аӈвока гымлэӈ г’уевык тыг’ыллыг’у аӄачыг’ычгиӈа. То эв’ынчам ымоӈ ею йинчоччымавык»,- эвыӈ инэллэчг’ын крайик.
В. Солодовынак тывынэн вагиӈын галалг’ы гивикин, титэ инэнмэлэв’ъиччету апличоччымав’ка гиллинэв’ йинмэлэвэвык ӈыволг’о тыг’ылык аӄачыг’ычгиӈа.

Тэнмо йинчоччымавык имы ею тит эӄлэткэ итык, ӈэвэк ‘ яӈвоӈ нытуйӄин чыг’ычгиӈын, кытаван йингыйивэтык ӄутин неделяк.

Эначгыпавэ С. Тынанто.
Дни рождения в этом месяце
Парламентская ассоциация «Дальний Восток и Забайкалье»