Салехардак галай Майӈумэкэт айгытӄываятэн РФ

Салехардак галай Майӈумэкэт айгытӄываятэн РФ

10.04.2021 08:45:54 (GMT+12)

Салехардак галай Майӈумэкэт айгытӄываятэн РФ
Салехардак пылиткуй вэтатык ll Майӈыумэкэт айгытӄываятэн юнэтылг’ин Айгытӄыӈӄал, Сибирик то ДВ РФ.

Майӈыумэкэтык нэнумэкэв’нэв’ ынпычг’у, инэллэчг’у тойваятъиччетин, айгытӄылг’у Айгытӄыӈӄалыӈӄо, Сибириӈӄо то ДВ РФ гамгарегионыӈӄо то ымыӈ эллай учёныё то ӄуччев’ меӈию ковэтанӈыволаӈ пыӈлойпыӈ айгытӄываятэн.

Йинв’аӈанма Майӈыумэкэт в’аӈлагиӈэпыӈ Президентан РФ В. Путинын, в’аняватэ инингив’ инэллэчг’ин Администрацияк Президентан РФ М. Магомедов.

Яноткэнак г’ылв’ыйик умэкэльг’этылг’э натанвэтгыӈнав’ пыӈлов’ государственный гамгаваятэн этгиӈо политикакэнав’ то вэталлай секцияк «Яйтаӈгиӈо то йиныплэпав’гиӈо чининваяткенав’ вэтгиӈо», «Энангыёлав’гиӈо, культуран то пыӈлов’ чининкинэкъйит йилыйилыкъйит», «Тойваятэн политикан то спортакенав’ этгиӈо», «Социальный малъэтгиӈо».

Ӈыеӄэв’кинэк г’ылв’ыёк галай умэкэт, миӈки нэгитэн то натанвэтгыӈын пыӈыл «Тайкыёлӄыл йиплэпав’гиӈыкъет ёнатгиӈо айгытӄываятэн Айгытӄыӈӄалыӈӄо, Сибириӈӄо то ДВ РФ: эчгикинэв’ метгиӈо в’уткекьйит вэтатык, нытуйӄинэв’ ӈывогиӈо, то танвэтгыӈгиӈо»

Опта ынанг’ыло Майӈыомаканма галай lX съезд Ассоциациякэн айгытӄываятэн Айгытӄыӈӄалыӈӄо, Сибириӈӄо то ДВ РФ.

Тыӈивылг’э амакайтыӈ гымлэӈ инэллэчг’у Ассоциациякэн айгытӄываятэн РФ нэйичин Г. П. Ледков. Ӈыёчаӈ ынно ныг’эли инэллэчг’у айгытӄываятэн. Тыӈивылг’э съездайтыӈ напаломтэлнав’ в’аняватгиӈо Г. Ледковын вэтгиӈыкъет ӈыяӄ гэвэгиӈо.

Ӈыёӄав’кэнак г’ылв’ыёк умэкэльг’этылг’у эллай этнографический ванык нымъёлгык Горнокнязевск, в’утку ямкечелг’ыйикыӈ нэнгыйивэннэв’ этгиӈо то ёнатгиӈо ваятэн Российский Айгытӄыкэн.

Эначгыпавэ С. Тынанто.

Йипыткаво Галинанын Уркачан.
Дни рождения в этом месяце
Парламентская ассоциация «Дальний Восток и Забайкалье»