Айгытӄыӈӄал Камчаткак гантоӈвав’лэн виткукин ныквуӄин ваны - яӈъя гыннитылг’ын нучельӄын «Гытгын Паланкэн»

Айгытӄыӈӄал Камчаткак гантоӈвав’лэн виткукин ныквуӄин ваны - яӈъя гыннитылг’ын нучельӄын «Гытгын Паланкэн»

05.03.2021 08:13:41 (GMT+12)

Айгытӄыӈӄал Камчаткак гантоӈвав’лэн виткукин ныквуӄин ваны - яӈъя гыннитылг’ын  нучельӄын «Гытгын Паланкэн»
Ӄутин вэтатвытгыйик яӈвоӈ вэтатык тайкыёлӄыл Инэллэиччетин Камчатский крайик, маӈэныӈӄо Палангэӈкы то Тигильский муниципальный районык гымлэ нэетэйкыӈын государственный яӈъя гыннитылг’ын ваны региональный этгиӈэпыӈ «Гытгын Паланкэн», миӈки келлаӈ 80 тыс.га.

«В’уччин ваны янот яӈъя нагыннитын 80-ый гэвэвэгиӈык, ынняӄ 2010 гэвэгиӈык нэпъйин катгогиӈын яӈъя гыннитылг’ин ваны. Гытгын Паланкакэн китыӈ ынан ныкувуӄинэну лэлӈынаят вано. В’утку котвалаӈ амалваӈ валг’о тыӈэчг’у. В’аняватгиӈо тит гымлэӈ гытгын Паланкэн ныг’ынг’элын яӈъя гыннитылг’у вано мэлу нэлӈынэв’ инэллэчг’э умкылв’ыгэпыӈ то экологиякэн РФ то ымыӈ яйтаӈылг’а умкылв’ыно»,- эвыӈ инэллэчг’ын умкылв’ынэпыӈ то экологиякэн крайик А. Кумарьков.

Йинтоӈвав’гиӈын яӈъя гыннитылг’ын ваны наӈвогаг’ын 2019 гэвэгиӈык юнэтылг’э Паланык, меӈию котгыманӈыволаӈ яйтаӈык нучельӄыкинэв’ пыттоӈо, мыев’ ӈанко ӈыволай амамъйиг’алёӈ тагийниӈкы.
«В’утин заказникык эмэлкэ янныӈэйтылайкэ айгытӄываято, тит йилэк чиникинэв’ вэтгиӈо то ёнатгиӈо. Опта эмэлкэ айгытӄылг’а нанг’ыайтайкынав’ ӄояв’. То ымоӈ юнэтылг’э эмэлкэ нэейичийкынэв’ ывынг’у, пыг’онав’, то в’иннетычг’у йинмэлэвэвык тыӈэчг’у. Катгогиӈо айгытӄываятэн ӄыйим г’ыныпъйинэв’»,- иви А. Кумарьков.

Ынняӄ гытгык Палакэн наянг’отавэкынав’ экмитык нучельӄыкинэв’ пыттоӈо, тагийниӈгиӈо, ӈэвэӄ уйӈэ эллэкэ наконтыӈвоӈнав’ айгытӄываяткечг’энаӈ валг’о ёнатгиӈо. Опта наянг’отавэкынав’ тэйкык вэтгиӈо, меӈинэтэ нэкунг’эӄэчгуӈэв’ӈынэв’ умкылв’ыно то нучельӄу. В’аняватгиӈэпыӈ министран йинтоӈвав’гиӈын яӈъя гыннитылг’ын ваны ев’иннетики яйтаӈык митг’аваны ӄулинъёнатылг’ыйикыӈ. Ынно енг’элыӈ яноткенано ныквуӄин вано, тит яйтаӈык умкылв’ыно то нучельӄу. Яӈъя наягынниьикынав’ кытэпо, кайӈу, йильг’эвыччылг’у гийнику то лэлӈынаятвано чеччыыннин.

Эчгыпо йинчоччымав’нэн С. Тынанто.
Дни рождения в этом месяце
Парламентская ассоциация «Дальний Восток и Забайкалье»