Ӄояыпаӈа чав’чувачг’энаӈ тэйкылг’ын, тывылг’ын эпенак, ныг’эли янотычг’о «Ячвыӈчатык митычг’ин тэпичгыӈкы»

Ӄояыпаӈа чав’чувачг’энаӈ тэйкылг’ын, тывылг’ын эпенак, ныг’эли янотычг’о «Ячвыӈчатык митычг’ин тэпичгыӈкы»

25.02.2021 08:18:42 (GMT+12)

Ӄояыпаӈа чав’чувачг’энаӈ тэйкылг’ын, тывылг’ын эпенак, ныг’эли янотычг’о «Ячвыӈчатык митычг’ин тэпичгыӈкы»
Ынанмитычг’ын тэпичгыӈкы «Берингияк-2021» нэйичин лыкл’эӈкин фестивалик. Карина Малахова итылг’ын блогеро, тапечгыӈма кэнанпыткав’ӈывоӈнэн пичгу, то коннейӈывоӈнэн инстаграмайтыӈ йипыткавылг’о пичгу, то кокалэӈвоӈнэн миӈкые ыччу накопанӈывоӈнав’. Тойэльга уйӈэ эейгучевӈыкылг’ин ныг’элык тэпичгыӈылг’у, чинин кометытванӈывоӈ. Ячвыӈчатгиӈыӈ йинчоччымав’нэн ыпаӈа ӄоякинуӈванэн, ӈакые йиччунин ымыӈ ею, тит нычачаӄэн ныминым ныг’итики. Ыннею инэгэю тывынэн эпенэк, меӈию айӈон тапечгыӈма накояваӈвоӈнав’.

«Гымнин вава- чав’чываӈав’, ыпполёӈӄо ӄонпыӈ мытокопав’ӈыволаӈ, тыттель мэлу ыннин пичгын тыкулӈыӈын. Тэв’ӈывок, тит ямкичилг’а нанг’ытав’аӈын мучгин ыпаӈа. Ватӄэначг’энаӈ тытапаӈык, то тоӈватэ нычачаӄэн ыпаӈа»,- эвыӈ К. Малахова.

Ячвыӈчанма ынно пав’чиӈати, лиги элӈыкылг’инэв’ пичгыкъит, этун алваӈ валг’ын ыпаӈа йитыӈ. Ынняӄ инэнчичг’этылг’э тыттэль мэлу нэлӈын пичгын, ыпатылг’ын чав’чывачг’энаӈ- эльг’ата экминин яноткен ойпакмет. То ынкыӈ нэйилын сертификат 10000 пылв’ынтолг’ын вэлиткояйтыӈ- в’иннетычг’ын ячвыӈчатгиӈыкэн.

Ӈыеӄэв’кину йингыйивэтык тэпичгыӈкы ныг’эли В. Литвинов. Ынан инг’э йинчоччымав’нэн ӈыёк амалваӈ валг’о пичгу. Ынкыӈ нэйилын диплом то сертификат 8000 пылв’ынтолг’ын.
М. Ледневынак йингыйивэннин ӈыччеӄ пичгыт: ынныпичгын то ӄоякинуӈванын. Ынно ныг’эли ӈыёӄав’кэно, сертификат нэйилын 3000 пылв’ынтылг’ын.

Ачг’ыач Е. Коваленконын ныг’эли ӈыяӄав’кено, ынан тэйкыкин ыпаӈа- миӈки яванэн ӄавеёв’ Нунтымӄин майӈыаӈӄанэн: чеччыыннин то илгыыннин то яванэн тапечгыӈма имыяӄ аӈӄакенав’ пичгу.

Эчгыпо йинчоччымав’нэн С. Тынанто.
Дни рождения в этом месяце
Парламентская ассоциация «Дальний Восток и Забайкалье»