Эчгыпо Камчаткакенав’ чав’чываеличг’энаӈ 22.01.2021 г.

Эчгыпо Камчаткакенав’ чав’чываеличг’энаӈ 22.01.2021 г.

22.01.2021 08:40:59 (GMT+12)

Эчгыпо Камчаткакенав’ чав’чываеличг’энаӈ 22.01.2021 г.
Галалг’ы вэтатг’ылв’ыёлв’ык крайик г’ояв’лай ӄымек 100 тойг’этолг’о. Мыкыӈ келлаӈ ӄайикмиӈу.

Вэтга ӄутин районык мыкаллай мыккымиӈылг’уяйичг’о. В’отэныӈӄо кев’лаӈ вэтатылг’о иччетык, миӈки ымыӈ ею янг’ав’ наког’энайилӈывоӈнав’ региональный иччетык ЗАГС то аривакенав’ этгиӈо.

В’ото Олюторский районык ӈыяӄав’кенано кымиӈу ныг’эли ӄайикмиӈын- Михаил, мыллыӈӄаво- ӈавытӄатпиль Северина, в Усть-Большерецком ӈыяӄав’кено ныг’эли ӄайикмиӈын Даниил, Быстринский районык ӈыёӄав’кено яйичг’ык накалин ӄайикмиӈын Артём.

Ымоӈ ӈыёӄав’кенак неделяк 2021 г. г’ояв’лай 96 кымиӈу: 53 ӄайикмиӈу то 43 ӈавытӄатпилляӄу.

Ӄайикмиӈу нэтэныныӈнэв’: Фёдор,Виктор, Алексей, Макар, Кирилл, Матвей, Платон, Аарон, Клим, Григорий, Елисей, Марк, Демьян. Ӈавытӄатпелляӄыӈ нэйилнэв’ нынну Раиса, Доминика,Алиса, Полина, Белла, Валерия, Дарья, Василиса,Мира, Алевтина.

*

Инэллэчг’э энангыёлав’гиӈэпыӈ крайик нэкуг’эйӈэв’ӈынэв’ инэнгыюлвылг’у ячвыӈчатгиӈэтыӈ, тит ныг’ыӈвонав’ вэтатык калэяк, миӈки коӄлалаӈ энангыёлавылг’ыйикыӈ 14 лыгуллэв’ыт йиг’элгыӈӄо 15 гыёлг’атйиг’элгэтыӈ нэкекминӈынэв’ документав’.

Галалг’ыгэвэгиӈыӈӄо ковэтатыӈ федеральный каличитваны «В’уйвыпиляӄкэн инэнгыюлэвылг’ын», меӈин кув’иннетыӈ лыг’ук вэтатвано энангыёлавылг’ыйикыӈ нымъёлгык, миӈки коёналаӈ мальтэг’и 50 тысячав’ юнэтылг’у.

2021 гэвэгиӈык коӄлалаӈ 8 энангыёлавылг’ыйикыӈ. Инэнгыюлэвылг’у математикайпыӈ нэкуг’энӈынэв’ Николаевский калэяк, калэяк Елизовский районык, Кольпачык Пенжинский районык, В’ив’нык Олюторский районык, калэяк Вилючинскак.

Опта уйӈэ инэнгыюлэвылг’у русский еличг’энаӈ то литератураӈӄо Вилючинскак, Таловкак Пенжинский районык нэкуг’энӈын инэнгыюлэвылг’ын биологиякен, Оссоракен калэяк- инэнгыюлэвылг’ын английский еличг’энаӈ, инэнгыюлэвылг’ын йинмитытватык вэтатык имы еӄык Апигикин калэяйтыӈ Пенжинский районык.

Эчгыпо йинчоччымав’нэн С. Тынанто.