Гымлэн’ тэйкык ян’ъя валг’о гыннетгин’о «Гытгыкэн Паланкэн» накончоччымав’н’ынав’ Камчаткак 2021 гэвэгин’ык

Гымлэн’ тэйкык ян’ъя валг’о гыннетгин’о «Гытгыкэн Паланкэн» накончоччымав’н’ынав’ Камчаткак 2021 гэвэгин’ык

15.01.2021 08:38:42 (GMT+12)

Гымлэн’ тэйкык ян’ъя валг’о гыннетгин’о «Гытгыкэн Паланкэн» накончоччымав’н’ынав’ Камчаткак 2021 гэвэгин’ык
Инэллэчг’э крайик омакан’ Законодательный Умекетык наян’вон’ын’ гымлэ тэйкык ян’ъя валг’ын гыннетгин’ын ванэн «Гытгын Паланкэн».

Ыннею вэтгин’о наконтон’вав’н’ынав’ тит яйтан’ык метг’агин’о камлэлын’ «Гытгык Паланкэн». В’уччин ваны китын’ ныквук’инэну, мин’ки колалн’ыеллалан’ чеччыынну ымын’ Северо- Восточный Азияк. В’утку опта котакыччыёлгын’волан’ то копан’ав’ъейн’ыволан’ имыяк’ пычик’ав’, накояяйтан’нав’ кайн’у тэк’ын Курильский ванык. В’утин гытгык опта накояяйтан’нав’ гылчык’н’ытов’ мен’ию котвалан’ Паланкэн то Корковаямкэн ванык.

1980-2010 в’уччин ваны итти заказнико. То ек’к’э энк’эви ынниг’ан валг’о итык.

«Чаткаён’гин’о тит гымлэ ныг’итикынэв’ гыннетгин’о Гытгэн Паланкэн натвынав’ инэллэчг’э в’ойвын’к’о Палана то ыччу мэлу нэлн’ынэв’ инэллэчг’э крайик ымын’ научный вэтатъиччетэ мен’иныйик накояйтан’н’ывон’нав’ умкылв’ыно. В’утин ванык еллайкэ 80 тысяч гектарав’. Йинтон’вав’гин’ын ынниг’ан валг’эн ваны (ООПТ) ев’иннетики накумг’ыг’ав’ гыннитык лалн’ынаятыны чеччыыннин. Эчги в’утин ваныкъет мыткуг’энн’ынэв’ танвэтгын’гин’о краевой тын’ивылг’ин ваятэн»,- эвын’ инэллэчг’ын умкылв’ынэпын’ то экологиякен крайик А. Кумарьков.

2019 гэвэгин’ык льгичейпыйиг’илгык метг’ан’ нийгулэтын ваны, мен’ин наян’вон’ын гыннитык вэтатылг’а филиалык Тихоокеанский институтын’к’о географиякен Дальневосточный иччетэ РА.

Заказникано лын’ылг’ын ваны наянтон’вав’н’ын Палангэн’кы то Тигильский районык то енг’элын’ виткукинэну майн’ывано яйтан’ык пыттон’о ООПТ айгытк’ын’к’ал крайик.

Энанъеёлав’гин’ын:
Заказнико валг’ын ваны «Гытгын Паланкэн» гантон’вав’лэн Камчатский областной иччетэ тын’ивылг’ин ваятэн 29.04. 1980 г. номерылг’ын 238 «Йинтон’вав’гин’ын заказник областной этгин’эпын’ «Гытгын Паланкэн» Тигильский районык. В’уччин ваны итти 8 заказнико, йинтон’вавылг’о 1980 г. Корякский автономный округык, то ыннею катгогин’о пылитколай н’ывома 2000 гивив’. Экмитлг’э федеральный законэпын’ танвэтгын’а заказнико Корякский автономный округык пылитколай итык 2010-2011 гэвэгин’ык.

Эчгыпо йинчоччымав’нэн С. Тынанто.