Эчгыпо Камчаткакенав’ чав’чываеличг’энаӈ 04.12.2020 г.

Эчгыпо Камчаткакенав’ чав’чываеличг’энаӈ 04.12.2020 г.

04.12.2020 08:35:17 (GMT+12)

Эчгыпо Камчаткакенав’ чав’чываеличг’энаӈ 04.12.2020 г.
Камчаткак галай яноткэн умекет вэтатъиччетин ячвыӈчатылг’эн г’ытг’ылг’ин «Берингия-2021». Умекэтылг’э натанвэтгыӈнав’ пыӈлов’ миӈкые ягалаӈ ячвыӈчатгиӈыӈ, нэйичин инэллэчг’ын в’утин «Берингиякэн», мэйӈычг’ын микнэк егитэйкынин ячвыӈчатгиӈын то ятвэкынэн мекив’ миӈкые коячвыӈлаӈ, опта нэйичин гийниклекар.

«Мую мытвэтгыльг’алла, в’утин гивик г’ытг’ылг’атгиӈык нэетэйкыӈнэв’ имыяӄ этгиӈо. Ымыӈ яячвыӈчаллаӈ г’ытг’ылг’у кымиӈу то ынпычг’у, ымыӈ ягалалаӈ нэӈиньмыӄинэв’ энанв’алэлӈатгиӈо спортакен ванык Фатьяновын, опта ягалаӈ ангыт «Г’ылг’ылкин йиг’эт». Ыннею еллайкэ йигыеватгиӈо чиниваяткэнав’ лайвыгиӈо- г’ытг’ылг’атгиӈо. Мую мыткев’лаӈ, ыннин ячвыӈчатгиӈын  этг’у ван эӈиньму нэелӈыӈын Камчаткак, Дальний Востокык то  ымнутэк»,-эвыӈ инэллэчг’ын Камчатский крайик В. Солодов.

В’утин умекэтык инэллэчг’у «Беригияк-2021» нанпыгаг’ын А. Рудович. Ӈыяӄмыллыӈӄав’кэн гэвэгиӈыӈ ынно кунг’элиӈ инэллэчг’у.

То инанъинпаӄавылг’у ячвыӈчатгиӈык «Берингия» йитыӈ А. Гулей, мейӈычг’у гийниклекаро ганпылин  К. Томашева, вэтатылг’ын Елизовский районный ванык лекаратык гийнику. Опта натанвэтгыӈнав пыӈлов’ йиг’этыкъет г’ытг’ылг’ин.

«2021 гэвэгиӈык йиг’эт ячвыӈчатылг’эн г’ытг’ылг’ин ягалаӈ Эссоӈӄо Оссорайтыӈ. Йиг’эт натанвэтгыӈын. Ею еппы эпли тэйкыкэ, наяӈвоӈнав’ йиплэпавык инэллэчг’э ячвыӈчатылг’эн «Берингия» то инанъинпаӄавылг’а»,- эвыӈ инэллэчг’ын крайик.
*
Инэллэчг’у Думак Алеутский муниципальный округык нэйичин Г. Королёва.

Ынно гайтолэн в’уйвык Никольское Алеутский районык. Эчги ынно ковэтатыӈ инэллэчг’у Алеутский филиалык КГКУ «Камчаткакен гынун вэлатгиӈпыӈ государственный то социальный пылв’ынтыв’эннятгиӈо», то этг’у кинэллэӈнин иччет айгытӄываятэн Командорак.

«Галина Леонидовна ымъёнатгиӈын ковэтатыӈ Алеутский районык. Ынан ымыӈ ею лиги кулӈыӈнин, ынинэв’ метгиӈо вэтатык яв’эннялаӈ йиплэпавык ёнатгиӈо чининнутэк»,-эвыӈ С. Лебедев.

Эчгыпо Камчаткакенав' чав'чываеличг'энаӈ 03.12.2020 г.: https://fareastvip.ru/newswire/detail.php?ID=250667
Губернаторы ДФО в 2020 году

22.01.2021 14:37:05 (GMT+12)

Губернаторы ДФО в 2020 году