Эчгыпо Камчаткакенав’ чав’чываеличг’энаӈ 03.12.2020 г.

Эчгыпо Камчаткакенав’ чав’чываеличг’энаӈ 03.12.2020 г.

03.12.2020 07:52:21 (GMT+12)

Эчгыпо Камчаткакенав’ чав’чываеличг’энаӈ 03.12.2020 г.
Камчаткак ӈывой вэтатык ыннэн телефонный ваны аӄачыг’ычгиӈыкъет. Ӈэвэӄ в’аняватык «122» телефонэпыӈ, эмэлкэ эйӈэвык инэнмэлвылг’у яйтэтыӈ тыг’ыллыг’ыйикыӈ COVID-19, то опта инэнмэлэв’ъиччету, меӈиныйик инг’э накойилӈывоӈнав’ в’эннятгиӈо. Кол- центрак ымыӈ ею накотвыӈвоӈнав’, то яӄам ков’аняванӈыволаӈ поликлиникайтыӈ, то ӄутин малав’ъяйтыӈ.

Инэллэчг’ын гынункин айнав’гиӈэпыӈ ГКП «Ыннэн инэнгитэвылг’ын гынун» Н. Арабей эвыӈ, титэ ӈывой итык ватӄэн мыкатгиӈын аӄачыг’ычгиӈэн, ӈыволай ӈынвычгаё в’аняватык телефонэпыӈ, ӄымек 90 г’уемтэв’илг’у г’ылв’ийняӄу. Ӄутиныйик операторыйик накакменӈывоӈнав’ мыкыӈ 200 айӈавыткогиӈо юнэтылг’ин.

«Титэ козвонинӈыволаӈ «122», ийкын ‘ накев’ӈывоӈнав’, тит ычгынан нэнг’ыйичин в’эннятгиӈ, то яӄ пыӈлов’ накоятвыӈнав’ тит янг’ав’ йинмэлэвэвык меткэ кымиӈу, меткэ ынпычг’у. То в’ача яӄам наконӈэвыӈвоӈнав’ пыӈлов телефонэпыӈ контакт- гынонэтыӈ. Ӈэвэӄ актыка ӈакые звонитык, в’утин иччетык наяннеёлав’ӈынав’ пыӈлолг’о»,-эвыӈ Н. Арабей.

Эчги кол- центрак г’ылв’ийняӄу то ныкиняӄу ковэталаӈ ӈыяӄ специалистав’ , ӈыечгеи кинӈи в’иннетычг’у медицинский колледжаӈӄо. Выг’аёк наянымкав’ӈынав’ вэтатылг’о, меӈию нэег’эйӈэв’ӈынэв’ эччатыӈӄо 112.

***

Яйнама ынан эӈг’элу лыӈылг’ын ангытыткогиӈын Камчаткак наӈвогаг’ын ячвыӈчатгиӈын кымиӈылв’ынык - ынанмитычг’ын рисоватык «Тойгэвэгиӈыкэн Камчаткан». Нэкуг’эйӈэв’ӈынэв’ кымиӈу йингыйивэтык метгиӈо рисоватык, маӈэныйикыӈ келлаӈ 8-12 гэвэгиӈо. Эмэлкэ нэг’ынгыйивэнэв’ ӈэӈиньмыӄинэв’ рисункав’ тойгэвэгиӈыкъет, то эмэлкэ нанг’ыявайкынав’ амалваӈ валг’о краскав’- акварель, гуашь то ӄуччев’.

Нэкуг’энӈынэв’ митг’айинав’ рисункав’ тойгэвэгиӈыкъет. Тит нэйиг’этикынэв’ юнэтылг’у яйнама Нытуйӄин гэвэгиӈын.

В’уччин ячвыӈчатгиӈын ягалайкэ ӈыччеӄ энангыеватгиӈык. Яноткэн йитыӈ яйгочав’ӈыиччетылв’ынык крайик 18 г’ылв’ыетыӈ яяв’очг’ыйилгык.

Ӈыеӄэв’кин энангыеватгиӈын ячвыӈчатылг’эн (региональный) 19-23 г’ылв’ыйик  в’утин йиг’илгык ягалаӈ Камчатский ванык кымиӈычгин творчествак. Иччетэ, меӈин китыӈ жюри наяӈвоӈнав’ гитэк рисункав’ то лыг’ук янотычг’о, ынан митычг’у рисоватык.

Эчгыпо йинчоччымав’нэн С. Тынанто.

Эчгыпо Камчаткакенав' чав'чываеличг'энаӈ 02.12.2020 г.: https://fareastvip.ru/newswire/detail.php?ID=250666
Губернаторы ДФО в 2020 году

22.01.2021 14:37:05 (GMT+12)

Губернаторы ДФО в 2020 году

Дни рождения в этом месяце
Парламентская ассоциация «Дальний Восток и Забайкалье»