Эчгыпо Камчаткакенав’ чав’чываеличг’энаӈ 02.12.2020 г.

Эчгыпо Камчаткакенав’ чав’чываеличг’энаӈ 02.12.2020 г.

02.12.2020 08:48:18 (GMT+12)

Эчгыпо Камчаткакенав’ чав’чываеличг’энаӈ 02.12.2020 г.
Камчаткак наӈвонав’ тэйкык йитг’атвылӈыгиӈо ёнатылг’ыйикыӈ иччетэ «Ыннэн валг’ын Россиян», мыев’ конг’алаӈ 19 гэвэгиӈо. Янотыӈ йинв’анявав’нэн юнэтылг’у инэллэчг’э Законодательный умекетык крайик, то опта итылг’ын региональный иччетык «Ыннэн валг’ын Россиян» В. Раенко.

Дистанционный этгиӈэпын ынкайтыӈ в’анявалай 8 г’уемтэв’илг’у юнэтылг’у краевой гынунык то ыявак итылг’у нымъёлгыӈӄо. Натвынав’ пыӈлов’ вэтгиӈыкъйит ЖКХ, энанмалав’гиӈэпыӈ, социальный в’эннятгиӈэпыӈ то ӄуччев’.

Ынно эвыӈ, эмен общественный вано ыйик иччетин янотыӈ яллай в’эннятынвэтыӈ ваятыӈ, ӄэй келлаӈ эччыгиӈо аӄачыг’ычгиӈыкъет. Иччетэ йингыйивэннин миӈкые ыччу чаймыӈ ваятыӈ келлаӈ, то инг’э ымыӈ ею накотайкыӈвоӈнав’ тит в’иннетык. «То титэ ӈывой итык тыг’ылгиӈын аӄачыг’ычгиӈа, в’утин иччетэ наӈвонав’ йинв’эӈэтык общественный вано, миӈкые ӈыволай юнэтылг’э йилык пыӈлов’ аӄачыг’ычгиӈыкъет.
Вэтатылг’о общественный ванык ӈыволай в’иннетык ӈанэныйикыӈ мекив’ ниччыг’эв’ котвалаӈ- мыккымиӈылг’ыйикыӈ яйичг’ыӈ, ӄылатылг’ыйикыӈ имы яӄэпыӈ то ӈойлиг’ыйикыӈ. Ӄонпыӈ телефонэпыӈ г’уемтэв’илг’у ков’аняваллаӈ, накотвыӈнав’ пыӈлов’, эняччыгиӈо тыг’ылгиӈыкъет. Мытв’инненэв’ тысячав’ юнэттумгу».

А. Лиманов инэллэчг’ын Общественный ванык Инэллэчг’ин иччетык «Ыннэн валг’ын Россиян» Д. Медведевын, эвыӈ, ӄэй келлан ‘ энанг’отав’гиӈо аӄачыг’ычгиӈыкъет, эв’ынчам ягалалаӈ йитг’атвылӈыгиӈо омакаӈ юнэтылг’ык, яйнама этог’ылв’ий иччетин. Эмэлкэ в’аняватык телефонэпыӈ.

«Чеймык валг’ык 10 г’ылв’ыё юнэтылг’у наянв’аняванӈынав’ то наяпаломтэлӈынав’ пыӈлов ‘ юнэтылг’ин инэллэчг’э гамгав’ойвыӈӄо. В’утин гивик айӈавытколай общественный эччатыӈ мыкыӈ 1200 г’уемтэв’илг’у. То эмен ӄымэк чывипыт нэв’инненэв’ элэк йиччык аӄайпыгиӈо. Ватӄэнакъет пыӈлык нэйилнэв’ энанъеёлав’гиӈо», эвыӈ А. Лиманов.

Эмэлкэ гитэк титэ еллайкэ йитг’атвылӈыгиӈо иччетык «Ыннэн валг’ын Россиян» ванык: https://kamchatka.er.ru/activity/news/edinaya-rossiya-otmechaet-svoj-den-rozhdeniya-dekadoj-priema-grazhdan

Эчгыпо йинчоччымав’нэн С. Тынанто.

Эчгыпо Камчаткакенав' чав'чываеличг'энаӈ 01.12.2020 г.: https://fareastvip.ru/newswire/detail.php?ID=250665
Губернаторы ДФО в 2020 году

22.01.2021 14:37:05 (GMT+12)

Губернаторы ДФО в 2020 году

Дни рождения в этом месяце
Парламентская ассоциация «Дальний Восток и Забайкалье»