Эчгыпо Камчаткакенав’ чав’чываеличг’энаӈ 01.12.2020 г.

Эчгыпо Камчаткакенав’ чав’чываеличг’энаӈ 01.12.2020 г.

01.12.2020 08:48:05 (GMT+12)

Эчгыпо Камчаткакенав’ чав’чываеличг’энаӈ 01.12.2020 г.
Омакальг’анма инэллэчг’ын Камчаткакен эвыӈ, тит кыянпык йингычголав’гиӈо вэлатгиӈыкъет жилищно-коммунальный этгиӈэпыӈ ёнатылг’ыйикыӈ. Опта йилнин тайкыён йигулэтык тыг’ыччулг’у вэлатгиӈо келлаӈ бензиныкъет то дизельный мытӄин Камчаткак, ӈэвэӄ гитэк ӄуччев’ регионо ДФО.

Вэлатгиӈо жилищно-коммунальный этгиӈыкъет накотайкыӈвоӈнав’ Инэллэиччетэ РФ. Ынняӄ ӈывома 2016 гэвэгиӈыӈӄо тит вийиӈык юнэтылг’у то йингычголавык ычгинэв’ ёнатгиӈо инэллэчг’э крайик накокъянпыӈвоӈнав’ вэлатгиӈо, тит еӄӄым ангычголав’ка.

«Этгиӈо вэлатгиӈэпыӈ тыттэль ниччыӄин, гэмгэтгивик накакмэнӈывоӈнав’ имы миӈкые валг’о тайкыёв’. Ӄуччев’ кенӈыволаӈ йигычголавык вэлатгиӈо, ӄуччев’ йинив’тылэтвэтык. Мую мыткотгыманӈыволаӈ, тит унмык ангычголав’ка вэлатгиӈо, в’ача мытковэланӈывоӈнав’ субсидияв’, то ӄуччев’ в’эннятгиӈо. Ӄотэныйикыӈ чинин вэтатылг’ыйикыӈ эччатыӈ ыппульг’ав’ наконмайӈанӈывоӈнав’ вэлатгиӈо. Ам йингычголав’гиӈо вэлатгиӈэпыӈ яялг’атгиӈыкъет ёнатылг’ыйикыӈ 2021 гэвэгиӈык кытыл этэйкыкэ нэнг’ынтынэв’»,- эвыӈ В. Солодов.

То инэллэчг’э  крайик опта йилнин тайкыён, тит Региональный иччетэ миӈки вэлатгиӈо накогэтаӈвоӈнав’ крайик ӄонпыӈ нанг’ытвэкынав’ тыг’ыччулг’у бензин то дизельный мытӄу келлаӈ Камчаткак то ӄутин регионык ДФО. Тит ымыӈ ею в’отэнэпыӈ лиги лыӈык.

*
Тойчыг’ычг’энаӈ наяӈвоӈнав’ энанчэчг’атгиӈо тит лыг’ук аӄачыг’ычгиӈын. Ыннин явэнаӈ наколӈыӈвоӈын компьютерный томографо. В’отэныӈӄо ямэйкотвэллаӈ вэтгиӈо инэнмэлэвылг’ин лыг’ук аӄачыг’ычгиӈын. В’утинэтэ елэг’уйкынин ымыӈ эвыччыкылг’инэв’ тыг’ылгиӈо.

Кев’лаӈ аму нытуйӄин явэнаӈ япкийиӈ Камчаткайтыӈ ӄымек гынунык яяв’очг’ынйиг’илгык.

Ынниг’ан валг’ын явэнаӈ эмет накояваӈын ӄутин регионык Россияк. Инэнмэлэвылг’у кев’лаӈ эмен янг’ав’ котвыӈвоӈнэн тыг’ылгиӈо мыкыӈ 90%.

Эчгыпо йинчоччымав’нэн С. Тынанто.

Эчгыпо Камчаткакенав' чав'чываеличг'энаӈ 30.11.2020 г.: https://fareastvip.ru/newswire/detail.php?ID=250662
Губернаторы ДФО в 2020 году

22.01.2021 14:37:05 (GMT+12)

Губернаторы ДФО в 2020 году

Дни рождения в этом месяце
Парламентская ассоциация «Дальний Восток и Забайкалье»