Григорий Ледков: Этгиӈо ӄайваятэн Арктический иччетык нэкетгутвийкынэв’

Григорий Ледков: Этгиӈо ӄайваятэн Арктический иччетык нэкетгутвийкынэв’

30.11.2020 20:19:51 (GMT+12)

Григорий Ледков: Этгиӈо ӄайваятэн Арктический иччетык нэкетгутвийкынэв’
Инэллэчг’ын айгытӄываятэн Айгытӄыӈӄо, Сибириӈӄо то ДВ, итылг’ын сенаторо РФ Г. Ледков кивыӈ, этгиӈо ӄайваятэн Арктический иччетык нэкетгутвийкынэв’. В’уткекьйит ынно в’аняватэ Ымваятэн Арктический Умекетык «Г’ылв’ыё Арктикакенав’ то Антарктикакенав’ Москвак». Майӈыумекет галай Москвак 25-27 кытэплёйиг’илгык. Яноткенав’ этгиӈо эллай йинумэкэвык вэтгиӈо инэллэчг’ын, бизнесын, общественный иччетылв’ынин йиплэпавык арктический вано.

«Кайваято ковэталаӈ Арктический иччетык, ӈывома ынно йинтоӈвавык. Эмет галалай 25 гэвэгиӈо. Ӈывома вэтатык в’уччин иччет ӄайваято опта ӄонпыӈ в’утку кенӈыволаӈ. Ыннею келлаӈ катгогиӈо ӄайваятэн танвэтгыӈкы омакаӈ инэллэчг’ык государствак ёнатгиӈо ниччыг’эв’ ёг’ылг’о вано. Мойкыӈ Арктический иччет китыӈ вано омакаӈ вэтатык то томгылг’атгиӈо»,- эвыӈ Г. Ледков.

Ынно эвыӈ, ӄайваято ӄонпыӈ ков’аняванӈыволаӈ тит ныг’итикынэв’ вэтгиӈо тит йиплэпавык ёнатгиӈо ӈанко, то яйтаӈык культура то чининваяткенав’ пыттоӈо. «Эчги 25 гэвэгиӈо галалай, титэ гантоӈвав’лэн Арктический иччет, в’утку ныг’итикынэв ӄайваято, тит опта навэтгыльг’аллайкэ в’утин иччетык, то кытаван йинкетгутвэтык Секретариат ӄайваятэн»,-иви Г. Ледков.

Г. Ледков кивыӈ этгиӈо Секретариатэн вэтат иччетык, яв’эннялайкэ лыг’ук нытуйӄинэв’ инэллэлг’у ӄайваятэн. Ыннею ныг’итикынэв тойваято, меӈию яв’эннялайкэ йиплэпавык ёнатгиӈо. Ӈыччеӄ гэвэгиӈыт йинэллэки Россия Арктический иччетык, АКМНС и ДВ РФ, чтгыматыӈ тит вэтгиӈо ӄайваятэн нэкетгутвийкынэв’»,- эвыӈ Г. Ледков.

Ымваятэн Арктический умекет «Г’ылв’ыё Арктикакенав’ Москвак» нэкутэйкыӈнэв’ ӈывома 2010 гэвэгиӈыӈӄо. 2020 гэвэгиӈык ныг’аллай 200 гэвэгиӈо титэ нэнв’эӈэтын Антарктида лэйвылг’э аӈӄаӈӄо Ф. Беллинсгаузен то М. Лазарев. Умекет наӈвон лыӈык «Г’ылв’ыё Арктикакенав ‘ то Антарктикакенав’ Москвак». В’утку умекельг’этылг’э накотанвэтгыӈӈывоӈнав’ тайкыёв’ Президентан РФ йиплэпавык Арктический вано. Тайкыёлӄылэпын накояныплэпав’ӈынав’ ёнатгиӈо в’утин ванык. Энантоӈвавылг’о умекет ныг’аллай Министерстван РФ Йиплэпав’гиӈэпыӈ Дальний Восток то Арктикан, инэллэиччет  умкылв’ынэпыӈ то экологияйпыӈ РФ.
Губернаторы ДФО в 2020 году

22.01.2021 14:37:05 (GMT+12)

Губернаторы ДФО в 2020 году