Эчгыпо Камчаткакенав’ чав’чываеличг’энаӈ 27.11.2020 г.

Эчгыпо Камчаткакенав’ чав’чываеличг’энаӈ 27.11.2020 г.

27.11.2020 01:02:39 (GMT+12)

Эчгыпо Камчаткакенав’ чав’чываеличг’энаӈ 27.11.2020 г.
Камчатский крайик инэллэчг’э натвынав’ тайкыёлӄыло, тит нэг’уев’нэв’ социальный вано гамга в’уйвык 2021 гэвэгиӈык. Ыннею вано нэйичинэв’ чинин юнэтылг’э ечема инэллэчг’ын Камчаткакен.

Инэйичик эллай мыкыӈ 27,5 тысячав’ г’уемтэв’илг’у. Ычгынан нэйичинэв’ социальный вано, меӈию янотыӈ нэнг’ытэйкынэв’ ыйик в’уйвык. Мэлу нэлӈынэв’ 75 вано, итылг’у 71 нымъёлгык. Камчаткак витку наӈвонав’ ынниг’ан валг’о этгиӈо, титэ чинин юнэтылг’э нэкуйичиӈнэв’ вано, меӈию янотыӈ нэг’уев’нэв’.

Яноткэнав’ яёг’ыӈгиӈо келлаӈ, тит йингычголавык чаткаёӈгиӈо чинин юнэтылг’ин йиплэпавык ымыӈ ею гамга в’увык Камчатский крайик. В’отэныӈӄо эвыӈ вице-губернатор Камчаткакен П. Ясевич, йинв’аняванма эначгыпавылг’о калимитычг’у. Ӈынвычгая нэйичинэв’ вано паӈав’ъйийкинав’- 26. То опта тит нэнг’ытэйкынэв’:
16 спортакенав’ вано,
10 вано ӈайӄыёчгэн,
9 кымиӈычгин уйичвэтвано,
6 умкылв’ынгиӈкы паӈав’ъейвано,
4 ялеконво, хоккейный вано,
3 ӄаплитковано.

Юнэтылг’э ӈыччеӄ в’увык накалинав’ калив’ эналлачг’ыӈ Камчаткак, мыев’ эчги ӄуччев’ энаплэпав’гиӈо яноткенав’ г’ояв’лай. Ӄутиныйик нэкуеинингив’нэв’ тывылг’о в’аӈлагиӈо. В’анав’ӈайик спортакен ваны котваӈ тайкыёлӄылык. Яёлкагиӈык опта ватӄэн накоятвыӈын в’аӈлагиӈын. Яяв’очг’ыйиг’илгык в’утин тывылг’у в’уйвык ягалалаӈ умэкэту, миӈки явэтгыльг’аллаӈ, ею янотыӈ тэйкык.

«Ыннею тайкыёв’ нымэлг’эв’ ягалалаӈ. Ӄайлим чинин юнэтылг’у кочаткаёӈлаӈ ею ыйик в’уйвык нэг’уевикынэв’. Опта яӈволайкэ гыматык яйтаӈык чинин тывылг’о социальный вано»,-эвыӈ П. Ясевич.

Эчгыпо йинчоччымав’нэн С. Тынанто.

Эчгыпо Камчаткакенав' чав'чываеличг'энаӈ 26.11.2020 г.: https://fareastvip.ru/newswire/detail.php?ID=250660
Губернаторы ДФО в 2020 году

22.01.2021 14:37:05 (GMT+12)

Губернаторы ДФО в 2020 году