Эчгыпо Камчаткакенав’ чав’чываеличг’энаӈ 26.11.2020 г.

Эчгыпо Камчаткакенав’ чав’чываеличг’энаӈ 26.11.2020 г.

26.11.2020 03:21:47 (GMT+12)

Эчгыпо Камчаткакенав’ чав’чываеличг’энаӈ 26.11.2020 г.
2021 гэвэгиӈык яӈвоӈ вэтатык социальный тайкыён «Камчаткакен социальный картан». В’уткые инг’э наяёйкынав’ социальный пылв’ынто, то ӄыйим г’ынтакалиӈикынав’, то в’утку опта еллайкэ льготав’. В’уткекъйит в’аняватэ инэллэчг’ын Камчаткакен В. Солодов.

***

2021 гэвэгиӈык яӈвоӈ вэтатык тайкыён, тит гамга в’уйвык нэг’уев’нэв’ социальный вано. Инэллэиччетык крайик гэтэйкылинэв’ каликалу, миӈки вано ятвалайкэ, тыг’ыччулг’у еллакэ вэтгиӈо, титэ нэеплиткуӈнэв’ йинтыватык, то нанпынав’ г’уемтэв’илг’у меӈиныйик нэеллэйкынэв’ ыннею вэтгиӈо то нэенчичг’этикынэв’.

Инэллэчг’у Камчаткакенав’ кев’лаӈ , эмэт нэплиткунэв’ чоччымав’гиӈо, то наяӈвоӈнав’ йинтыватык ыннею вано. Эмэт лиги наӈвонав’ лыӈык миӈки йиг’ояв’лаӈ 73 тойвано. Тит вилэтык ыннею вэтгиӈо краевой бюджетыӈӄо пылв’ынто нэеннийӈынэв’ эналлаэччатыӈ гамгав’уйвык. Ыннею еллайкэ дотацияв’. В’отэныӈӄо ямейкотвэллаӈ пылв’ынтыакмэтгиӈо. Эмет пыткома чыӄг’ивив’йиг’илгын муниципальный иччетэ наяӈвоӈнав’ тэйкык ячвыӈчатгиӈо лыг’ук иччету таяӈылг’о.

В’уйвык Олюторский районык юнэтылг’э нэйичин йиплэпавгиӈын чининнымъёлгыкэн. Ийкыӈ нэетэйкыӈын ваны, миӈки ыннэникэ  наянчалюмкавэкынав’ ӈайӄу.

Ивашкак Карагинский районык ӈынвычгая мэлу нэкулӈыӈнэв’ спортакенав’ этгиӈо, в’отэныӈӄо ычгынан нэйвитын ваны, миӈки гытката коӄаплитколаӈ. Алак в’утку котваӈволаӈ ӄымек ӈыёӄ тысячав’ г’уемтэв’илг’у. Инэллэчг’э Камчаткак накончоччымав’ӈынав’ пылв’ынто, тит ӈанко йинтыватык спортакен ваны.

С. Лебедев иви, ӈывома нытуйӄин гэвэгиӈын эналачг’ыйикыӈ крайик то муниципальный иччетылв’ынык еллайкэ нымэйиӈӄинэв’ вэтатгиӈо, тит нанг’ыёг’ынав’ экмитылг’у тэнмо. Инэллэчг’у Камчаткакенав’ яв’эннялайкэ муниципальный эччатылв’ыныӈ.

Итылг’ын вице- губернаторо П. Ясевич эвыӈ, чинин юнэтылг’э нэкуйичиӈнэв’ ею янотыӈ нэнг’ытэкынэв’ ыйик в’уйвык, то чинин ковэтгыльг’аллаӈ яӄсоциальный вано янотыӈ ийкыӈ ныг’итикынэв’.

Эчгыпо йинчоччымав’нэн С. Тынанто.

Эчгыпо Камчаткакенав' чав'чываеличг'энаӈ 25.11.2020 г.: https://fareastvip.ru/newswire/detail.php?ID=250659
Губернаторы ДФО в 2020 году

22.01.2021 14:37:05 (GMT+12)

Губернаторы ДФО в 2020 году