Эчгыпо Камчаткакенав’ чав’чываеличг’энаӈ 17.11.2020 г.

Эчгыпо Камчаткакенав’ чав’чываеличг’энаӈ 17.11.2020 г.

17.11.2020 00:01:17 (GMT+12)

Эчгыпо Камчаткакенав’ чав’чываеличг’энаӈ 17.11.2020 г.
Паланык г’уеви нытуйӄин лэйвинэӈ лыӈылг’ын автобусо. Ынно нэйкуйин тайкыёлӄылэпыӈ «Йиплэпав’гиӈо пассажирский автотранспортав’», меӈин китыӈ государственный тайкыёк «Йиплэпав’гиӈо транспортакенав’ этгиӈо Камчатский крайик».

«Тит куйик ыннин транспорт ёнатылг’ыйикыӈ Паланык краевой бюджетыӈӄо эллай мыкыӈ 2 миллионав’ 800 тысячав’ пылв’ынто, то 1 миллион 700 тысячав’ чининкинэв’ пылв’ынто местный бюджетыӈӄо. Инэллэиччетэ Паланык нэтэйкын ячвыӈчатгиӈын тит нэнг’ыетын в’ойвэтыӈ автобус меӈинын вэлатгиӈын китыӈ 4,5 миллионав’ пылв’ынто»,- эвыӈ инэллэчг’ын траспортак то тайиг’этгиӈэпыӈ В. Каюмов.

Лэйвинэӈык «ПАЗ Вектор» котвалаӈ 23 вагалыно, то эмэлкэ ӈанкачыко нытвайкынав’ 56 г’уемтэв’илг’у. Законодательствайпыӈ РФ автобусык ымыӈ ею котвалаӈ тит нымийкуг’эв’ нэтыпгэтикынэв’ ӈуйлиг’у, унмык тыг’ыллыг’у меӈию чинин эв’эйчитке келлаӈ. Ымыӈ уетикилг’у тыг’ыллыг’у утгыкэ ятыпгалайкэ  автобусайтыӈ.

В’уччин автобус елэйвики гынун Паланык, то вагалынэтыӈ «Палана». Опта гайматылг’а нэейвитикынэв’ лайвыгиӈо нымнымэтыӈ Воямполкан то Тигилетыӈ.

***

Корякский округык плитконвэтыӈ в’уччин гэвэгиӈын, 10 яяв’ наяныплэпав’ӈынав’ ӄуӄлик ёнатылг’ыйикыӈ пенсионерыйикыӈ, меӈию коӄланӈыволаӈ пылв’ынтэпыӈ. Тайкыёлӄылэпыӈ инэллэчг’ин крайик В. Солодовын министерствайтыӈ энаплэпав’гиӈэпыӈ Камчаткан нэйилнэв’ мыкыӈ 2,5 миллионав’ пылв’ынто тит нэнг’ытэйкынэв’ ремонтанкенав’ вэтгиӈо.

Пылв’ынто нэннийнэв’ эналлаэччатыӈ в’уйвык Апукайтыӈ, Эчг’эетыӈ, Гынункин Поӄачайтыӈ то Ӄайильг’энэтыӈ.

Апукак нэетэйкыӈнэв’ ремонтакенав’ вэтгиӈо ветеранынаӈ вэтгиӈэпыӈ то ӈыечгэйиӈ пенсионерыйикыӈ. Эчг’эйик нэкуплиткуӈнэт йиплэпавык яят ӈыечгэйиӈ ынпычг’ыӈ. Гынункин Поӄачык ӈойлиг’ынаӈ ыпполёӈӄо наныплэпавын аякальг’атгиӈын. Ӄайильг’инык опта нэетэйкыӈнэв’ ремотакенав’ вэтгиӈо ӈыячгайиӈ ёнатылг’ыйикын. Ымоӈ ыннею вэтгиӈо нэеплиткуӈнэв’ в’утин гивик.

«Ынниг’ан валг’о нымэлӄинэв’ энаплэпав’гиӈо келлаӈ ег’атгиӈо, яйнама этог’ылв’ий Корякский округэн, маӈэнынаӈ конг’алаӈ 90 гэвэгиӈо»,- эвыӈ С. Лебедев

Эчгыпо йинчоччымав’нэн С. Тынанто.

Эчгыпо Камчаткакенав' чав'чываеличг'энаӈ 16.11.2020 г.: https://fareastvip.ru/newswire/detail.php?ID=250648
Губернаторы ДФО в 2020 году

22.01.2021 14:37:05 (GMT+12)

Губернаторы ДФО в 2020 году