Эчгыпо Камчаткакенав' чав'чываеличг'энаӈ 27.10.2020 г.

Эчгыпо Камчаткакенав' чав'чываеличг'энаӈ 27.10.2020 г.

27.10.2020 08:36:41 (GMT+12)

Эчгыпо Камчаткакенав' чав'чываеличг'энаӈ 27.10.2020 г.
Камчаткак ӈывома аӄачыг’ычгиӈын тыг’ылӈыволай 5521 г’уемтэв’илг’у. Ватӄэльг’энак вэтатвытгыйик тыг’ыллыг’у келлаӈ 45-51 . Камчаткак ганчоччымав’лэнав’ 5 малав’ъяк 460 вано, миӈки 301 эмет накояваӈнав’.

В’отэныӈӄо в’аняватэ эналлачг’ын крайик В. Солодовынаӈ инингив’ инэллэчг’ин Инэллэиччетык крайик Р. Василевский.

«Эчги ымроссияк ниччыӄинэв’ этгиӈо келлаӈ аӄачыг’ычгиӈыкъет,- эвыӈ В. Солодов.- Кев’лаӈ аму ӈэйӈэйик метке лыӄлаӈэтыӈ, амъел мыччавэталлайке элэк йиччык аӄачыг’ычгиӈын COVID-19. В’отэныӈӄо ӄонпыӈ лиги нэнг’ылӈикынэв’ ымыӈ ею тит яйтаӈык увикив’. Ныкыттыг’ав’ гитэк тит ӄонпыӈ нанг’ыявайкынав’ г’иӈытг’ымайпинӈу. То инчоччымавык вано, тит эӄэткэ, ӈэвэӄ наяёйкынав’ тыг’ыллыг’у малав’ъяк».

Р. Василевский эвыӈ эчги
этг’у ганчоччымав’лэнав’ инэгэю 159 йилӄывано, то эмет эмэлкэ этг’у ӈэвэӄ ӄылэтык, йинв’эӈэтык ӈыччеӄ малав’ъят. М. Волкова иви, паненячг’энаӈ ковэталаӈ инг’э йиллыг’у в’эннятгиӈо тыг’ыллыг’ыйикыӈ, опта накоёӈвоӈнав’ аӄачыг’ычгиӈылг’о малав’ъяйтыӈ. Ымыӈ котвалаӈ явэнаӈо ИВЛ, ымыӈ ею тит увикив’ вийиӈык. Ӈанэныйикыӈ меӈию яяк коямалав’лаӈ этг’у нэнг’ийкуйикынэв’ лекарствав’

«Мынтэйкынэв’ вэлиткогиӈо. Ӈэвэӄ котвалаӈ эняччыгиӈо, эмэлкэ в’эннятгиӈо мынв’аӈланав’ федеральный эналлаэччатыӈӄо. Кытаван инэгэю лекарствен эвилкэ итылг’у ныг’итикынэв’ мекив’ амбулаторный этгиӈэпыӈ коямалав’лаӈ. То тыг’ыллыг’у ынпыӈ 65 гэвэгиӈо то меӈинычгин котвалаӈ ӄонпыӈ валг’о тыг’ылгиӈо, ымоӈ кытаван нанг’ыёйкынав’ малав’ъяк. Тит амкатка тыг’ыллыг’у COVID-19, то эвиг’ыке ныг’итикынэв’,- эвыӈ Солодов.

Инэллэчг’э Камчаткак В. Солодовынак йиллэнин омакальг’атгиӈын тит амъел амкатка нытуйӄин ӈывогиӈын аӄачыг’ычгиӈэн. В’утку эллай ымоӈ инэллэчг’у инэнмэлэв’эччатыӈӄо, миӈки нэтэйкынэв’ моногоспиталё.
Йитг’атвылӈыма видео-этгиӈэпыӈ натанвэтгыӈнав’ вэтгиӈо малав’ъякэнав’, опта нэгитэнэв’ пыӈлов’, миӈкые наковэланӈывоӈнав’ инэгэю пылв’ынто энанмалавылг’ыйикыӈ федеральный этгиӈэпыӈ. Инэллэчг’э Камчаткак в’аӈланэн инэллэчг’ын Инэллэиччетык крайик А. Кузнецов, тит ынан чинин ныг’ынчичг’этикынин вэлатгиӈо энанмалавылг’ыйикыӈ.

Эчгыпо йинчоччымав’нэн С. Тынанто.

Эчгыпо Камчаткакенав' чав'чываеличг'энаӈ 26.10.2020 г.: https://fareastvip.ru/newswire/detail.php?ID=250600