Эчгыпо Камчаткакенав' чав'чываеличг'энаӈ 26.10.2020 г.

Эчгыпо Камчаткакенав' чав'чываеличг'энаӈ 26.10.2020 г.

26.10.2020 08:30:39 (GMT+12)

Эчгыпо Камчаткакенав' чав'чываеличг'энаӈ 26.10.2020 г.
Руслан Старых нэйичин инэллэчг’у Олюторский районык. Янот ӈанко итти О. Свириденко.

«Тыкопоздравлянӈын Руслан Васильевич, мыев’ нэйичин инэллэчг’у Олюторский районык. Ынно ӈынвыӄ гэвэгиӈо вэтатэ инэллэчг’у филиалык «Вагалыны Тэличчак». Гыммо тыкивыӈ, Р. Старых ятгыматики йиплэпавык ымыӈ ею районык»- эвыӈ С. Лебедев, пыче итылг’ын инэллэчг’у иччетык миӈки энаплэпав’гиӈо крайик накогетаӈвоӈнав’.

*

Камчаткак нэетэйкыӈын тайкыён в’иннетык митг’у ваятэн. Крайик митычг’у тэминӈык келлаӈ ӄымэк 200 г’уемтэв’илг’у. Мыкъян митычг’у тэминӈык коёналаӈ в’уйвыпиляӄык. Комкалаӈ тойваято опта тэминӈык.

Ыннэн эняччыгиӈын натанвэтгыӈын омакаӈ инэллэчг’ык крайик В. Солодовынак то ӄутин инэллэчг’ык, яйгочав’ӈыгиӈо митычг’ин тэйкык ымыӈ ею. Ӈынвычгаё чинин метытвэлай тэминӈык. Опта натвыгаг’ын аӄайпыгиӈын, мыев’ коӄлалан меӈӄойиӈ ею экмитык, тит тэйкык митг’алӄылу. Митычг’ин опта китыӈ эччыгиӈын- тит йинвилиткувык чининкинэв’ вэтгиӈо. Накакменӈывоӈнав’ вэлиткояйтыӈ, ынняӄ тыттель наконгычголав’ӈынав’ вэлатгиӈо. То ятан митг’алӄылу нэкуйкуйӈынэв’ ямкичилг’а. В’отэныӈӄо тэмиӈылг’ыйикыӈ тэг’и пылв’ынто наковэланӈывоӈнав’.

В. Солодов эвыӈ, кытаван йинчоччымавык тайкыён в’иннетык йиплэпавык то йингычголавык вэтгиӈо тэминӈычг’ин крайик.

«Мочгынан мынг’ыв’энняллан , тит мальӈыевыӄ лиги нэнг’ылӈикынэв’ йивилиткувылг’у тэминӈу, тит ыччу нэнг’ийкуйикынэв’. То митычг’ин тэминӈык ныг’итикынэв’ сертификато, тит лиги лыӈык янг’ав’ валг’о тэминӈу. То в’иннетык йиплэпавык вэтгиӈо тэминӈычг’ин, йинтоӈвавык калэяв’ инмитытватык туйчыг’у тэйкык апяткенав’ митг’алӄылу то тэминӈу. Опта ыччу йигыюлэвык, миӈкые тэйкылг’у митг’алӄылу йинвилиткувык. Йинмитытвавык чининкинэв вэтгиӈо йингыйивэтык. То опта йиплэпавык пыӈыл - меӈӄо ею экмитык, тит тэйкык художественный таменӈыгиӈо, митг’алӄылу. Ыннею келлаӈ нымэйиӈӄинэв’ вэтгиӈо омакаӈ»,- эвыӈ В. Солодов.

Эчгыпо йинчоччымав’нэн С. Тынанто.

Эчгыпо Камчаткакенав' чав'чываеличг'энаӈ 23.10.2020 г.: https://fareastvip.ru/newswire/detail.php?ID=250599