Эчгыпо Камчаткакенав' чав'чываеличг'энаӈ 23.10.2020 г.

Эчгыпо Камчаткакенав' чав'чываеличг'энаӈ 23.10.2020 г.

23.10.2020 08:33:13 (GMT+12)

Эчгыпо Камчаткакенав' чав'чываеличг'энаӈ 23.10.2020 г.
Калэйтылг’о кымиӈу ӄыйим ныӈвонав’ ейгучев’ӈык дистанционный этгиӈэпыӈ.В’отэныӈӄо в’аняватэ инингив’ инэллэчг’ин краевой энангыёлав’гиӈэпыӈ Е. Орешко.

«Гамга калэяк ымыӈ ею котвалаӈ тит атг’ылӈывока аӄачыг’ычгиӈа кымиӈу. Нэйкуйнэв’ явэнаӈо меӈинэтэ наконмытӈынав’ яйгочав’ӈывано. Гамгачыг’ыло накотайкыӈвоӈнав’ термометрияв’. Ымоӈ вэтатылг’а накояваӈнав’ г’иӈытг’ымайпинӈу. Инэнгыюлэвылг’э ӄонпыӈ накогэтаӈвоӈнав’ кытгэмгиӈо кымиӈин»,- эвыӈ Е. Орешко.

Ӈывома яйгочав’ӈыгиӈо, гамга классэн китыӈ ыннэн кабинет. Ӈэвэӄ ыннэн кымиӈын котг’ылӈывоӈ аӄачыг’ычгиӈа, ӄуччев’ коӈволан яяк ейгучев’ӈык дистанционный этгиӈэпыӈ.

«Эчги Камчаткак яяк дистанционный этгиӈэпыӈ кояйгочав’ӈылаӈ 38 классо, ымоӈ келлаӈ 989,- иви Е. Орешко- тыг’ылгиӈыкъет иненгыюлэвылг’у яяк кояйгочав’ӈылаӈ дистанционный этгиӈэпыӈ ымоӈ ейгучев’ылг’у 43 калэяк Петропавловскак-Камчаткакен».

Ачгэкенайтыӈ 29350 калэйтылг’о Петропавловск-Камчатский, Вилючинскак, Елизовский районык тыг’ылӈыволай аӄачыг’ычгиӈа 0,4 %. Ӄутин районык уйӈэ меки этг’ылкэ аӄачыг’ычгиӈа.

***

Инэллэчг’э Камчаткак наяпӈылоӈнав’ юнэтылг’у метке когаймалаӈ ыччу тэйкык прививкав’ тит атг’ылӈывока аӄачыг’ычгиӈа. В’уткекьйит в’аняватэ пыче итылг’ын инэллэчг’у энанмалав’гиӈэпыӈ крайик М. Волкова.

«Витку наӈвонав’ Россияк тэйкык вакцинав’ тит атг’ылӈывока COVID-19 , еппы тэг’и котвалаӈ. В’отэныӈӄо лиги мынг’ылӈылайке тэг’и г’уемтэв’илг’э нэкуетэйкыӈнэв’ прививкав’ тит нэнг’ыйилнэв’ федеральный гынунэтыӈ в’аӈлагиӈо»,- эвыӈ М. Волкова.

Эчги кочаткаёӈлаӈ миӈкые тэйкык пыӈлоткогиӈо. Аму ӄун тит плэпыӈ ныг’итики ёнатылг’ыйикыӈ, нэетэйкыӈын электронный этгиӈэпыӈ.

Опта мыткев’лаӈ инэллэчг’э гамгарайонык нэетэйкыӈнэв’ пыӈлоткогиӈо мекив’ когаймалаӈ г’ыйикӄал тэйкык прививкав’. То ыннею заявкав’ мойкыӈ нэеннийӈынэв’»,- эвыӈ М. Волкова.

Эчгыпо йинчоччымав’нэн С. Тынанто.

Эчгыпо Камчаткакенав' чав'чываеличг'энаӈ 22.10.2020 г.: https://fareastvip.ru/newswire/detail.php?ID=250597