Эчгыпо Камчаткакенав' чав'чываеличг'энаӈ 21.10.2020 г.

Эчгыпо Камчаткакенав' чав'чываеличг'энаӈ 21.10.2020 г.

21.10.2020 08:58:16 (GMT+12)

Эчгыпо Камчаткакенав' чав'чываеличг'энаӈ 21.10.2020 г.
Этг’у ӈыччэӄ малав’ъят нэенв’эӈэнӈынэт Камчаткак миӈки ятвалайкэ тыг’ыллыг’у аӄачыг’ычгиӈа   COVID-19 . В’отэныӈӄо эв’лай омакальг’анма, миӈки накогетаӈвоӈнав’ пыӈлов’ тит амкатка ныг’итики COVID-19.

В’утин вэтатвытгыйик нэкуплиткуӈнэв’ вэтгиӈо панэначг’энаӈ виткукинэк городкен малав’ъяк, то ӄутин вэтатаг’ылвыйик в’утку наяӈвоӈын тэйкык малав’ваны аӄачыг’ычгэӈылг’ыйикыӈ. Ынняӄ Елизовский районык 30 км накончочымав’ӈын ваны тыг’ыллыг’ыйикыӈ аӄачыг’ычгиӈа. Эчги ӈанко нэкуплиткуӈнэв’ вэтгиӈо тит нымэлӄинэв’ омыльг’атгиӈо ныг’итикынэв’ , то ымыӈ тит навэтатэкын гыйив’ӄэв’ лиги лыӈык ӈэвэӄ яӈволайкэ ӈылатгиӈо. В’утку еллайкэ тыг’ыллг’ыг’у меӈию уйӈэ еӄӄым этг’ылкэ, то ӈаеё, мекив’ коӈволаӈ мелэвык»,- эвыӈ пыче итылг’ын инэллэчг’у краевой энанмалав’гиӈэпыӈ М. Волкова.

Эчги малав’ъяв’ краевой гынунык уйӈэ яӄэпыӈ эӄлэткэ. Ымыӈ котвалаӈ явэнаӈо в’иннетык в’ыеӈток то тит нымэлг’эв’ ныг’ытвайкынав’ йиччав’. Этг’у нэкуннийӈынэв’ Камчаткайтыӈ 15 явэнаӈо ИВЛ.

Омакальг’анма эв’лай эмен Камчатка китыӈ янотычг’о ымоӈ Россияк, мыев’ ӈынвыӄ накотайкыӈвоӈнав’ тестав’ аӄачыг’ычгиӈыкъет. Нэкутэйкыӈнэв’ 478 йичечг’атгиӈо ыннэн стон тысячав’ юнэтылг’ин, то тэнмепыӈ келлаӈ 150.

*

Калэяк  Петропавловск-Камчатский, Вилючинскак то Елизовский районык ӈэйӈэйкинэв’ паӈав’ъейгиӈо еллайкэ мэллюлэӄ.

Ынниг’ан валг’о тайкыёв’ нэкминэв’ омакальг’анма.

Мыкъяк калэяк крайик яӈволаӈ паӈав’ъейгиӈо паненячг’энаӈ 26 ымычвилю то яплитколаӈ 1 кытэплёйиг’илгык. 21 ымычвилю йиг’илгык яӈволан паӈав’ъейгиӈо калэяк Елизовский районык то Соболевык, миӈки китыӈ чыг’ычгиӈын ОРВИ. Опта нив’нэв’ калэяк Петропавловск-Камчатский то Вилючинскак паӈав’ъейгиӈо ныг’иннэв’ 3 кытэплёйиэлгэтыӈ. 4 кытэплёйиг’илгык йитыӈ ангыт. В’отэныӈӄо кымиӈу яӈволаӈ калэйтык 5 кытэплёйиг’илгык»,- эвыӈ пыче итылг’ын инэллэчг’у энангыёлав’гиӈэпыӈ крайик Е. Орешко.

Опта нав’аӈланав’ вано миӈки инэнэгэю итылг’у яйгочав’ӈыгиӈо накойилӈывоӈнав’ Петропавловск-Камчатский, Вилючинскак то Елизовский районык, тит  ыччу паӈав’ъейма навэтатэкынав’ дистанционный этгиӈэпыӈ.

Эчгыпо йинчоччымав’нэн С. Тынанто.

Эчгыпо Камчаткакенав' чав'чываеличг'энаӈ 20.10.2020 г.: https://fareastvip.ru/newswire/detail.php?ID=250595