Эчгыпо Камчаткакенав' чав'чываеличг'энаӈ 20.10.2020 г.

Эчгыпо Камчаткакенав' чав'чываеличг'энаӈ 20.10.2020 г.

20.10.2020 08:47:21 (GMT+12)

Эчгыпо Камчаткакенав' чав'чываеличг'энаӈ 20.10.2020 г.
В’утин гивик каличитваныӈ «Камчаткак ымыӈ ею нымэлг’эв’ нэннийнэв’ 257 в’аняво миӈкые йиплэпавык явытгыё уйӈэ ятан Петропавловскак- Камчаткакен, ымыӈ ӄутин в’ойвыӈӄо калечелай. В’уткекъйит омакальг’анма эвыӈ инэллэчг’ын Камчаткакен В.Солодов.

Ӈынвычгаё калечелай краевой гынуныӈӄо. Мыкъята нав’аӈланав’ тит ныг’уевнэв’ спортакен вано.

В. Солодовынак йилнин тайкыён пыче итылг’ыӈ вице-губернаторо крайик П. Ясевичынаӈ, тит вэтгиӈо нэнг’ыплиткунэв’ ӈывома кытэплёйиг’илгын, мыев’ накоянчоччымав’ӈынав’ пылв’ынто бюджетык ӄотэнгевэйтыӈ.

*

Тит амъел амкатка аӄачыг’ычгиӈын, Камчаткак гымлэ нэтэйкынэв’ энанг’отав’гиӈо. Эчги нэкунчичг’энӈынэв’ миӈкые накояваӈнав’ г’иӈытг’ымайптинӈу. Ымыӈ гамгалэйвинэӈык нанг’ыявайкынав’ айпинӈу.

Опта ӈэйӈэйик ӄыйим ныпаӈав’ъйинав’ тит йиныплэпавык кытгэмо калэйтылг’о кымиӈу. Ыннин опта ев’иннетыӈ тит амкатка ныг’итикынэв’ тыг’ыллыг’у аӄачыг’ычгиӈа. В’отэныӈӄо в’аняватэ инингив’ инэллэчг’ин Инэллэиччетык крайик Р. Василевский.

«Соболевык: в’уткые нанӈивын инэнмэлэвылг’ын то вэтатылг’ын Роспотребнадзорык. Ӄонпын накончечг’анӈывоӈнав’ этгиӈо аӄачыг’ычгиӈыкъет. Пыче ван уйӈэ амкатка тыг’ыллыг’у»,- эвыӈ Р.Василевский.

Миӈкые нэкутилиӈнэв’ вэтгиӈо прививкакъет в’аняватэ вице-губернатор крайик А. Кузнецов.

«Эмет нэтэйкынэв’ прививкав’ 63 тысячав’ ынпычг’ыӈ то 21 тысячав’ кымеӈыйикыӈ. Ыннею келлаӈ 49% тэнмэпыӈ. Плиткома вэтатг’ылв’ыёв’ наяёг’ыӈнав’ 65-70%. Вацинав’ наяванав’ 69 %»,- эвыӈ А. Кузнецов.

В. Солодовынак йилнин тайкыён тит мельинг’э нэнг’ыплиткун вэтгиӈын прививкакъет, то в’отэныӈӄо в’аняватык пылиткома вэтатвытгыё.

Эчгыпо йинчоччымав’нэн С.Тынанто.

Эчгыпо Камчаткакенав' чав'чываеличг'энаӈ 19.10.2020 г.: https://fareastvip.ru/newswire/detail.php?ID=250594