Эчгыпо Камчаткакенав' чав'чываеличг'энаӈ 19.10.2020 г.

Эчгыпо Камчаткакенав' чав'чываеличг'энаӈ 19.10.2020 г.

19.10.2020 09:10:59 (GMT+12)

Эчгыпо Камчаткакенав' чав'чываеличг'энаӈ 19.10.2020 г.
17 ымычвилю йиг’илгык гантоӈвав’лэн Петропавловска- Камчаткакен. В’утку нэччилнэв’ в’ытв’ыто гыйив’ӄэвык Витусын Беринга.

Ёнатылг’ыйикыӈ городык в’анявалай вице-губернатор крайик П. Ясевич, инингив’ инэллэчг’ин Законодательный умекетык А. Копылов, инэллэчг’ын майӈыв’уйвыкин К. Брызгин то инэллэчг’ын городкен Думак Г. Монахова.

Ванык миӈки котвалаӈ Эӈг’элу лыӈылг’у юнэтылг’у галай умеете, миӈки натвынав’ нытуйӄинэв’ нынну Эӈг’элу лыӈылг’у юнэтылг’у. В’утин гивик Эӈг’элу лыӈылг’у юнэтылг’у ныг’элгыг’и ӈыечгэйи. Янот итылг’у инэллэчг’у городык- А. К. Дудников то В. В. Скворцов(уйӈэ ныг’эллыг’ын). Ынинэв’ гыйив’ӄэву нэйилнэв’ ӈав’г’аныӈ.

Опта нэйилнэв’ гыйив’ӄэву «Малвэтгиӈыкъет городык» эӈг’элу лыӈылг’ын вэтатылг’ын культурак Россиияк Н. Козловой, эналлачг’ыӈ лицейик 46 Т. Углицких то тыӈивылг’ыӈ ваятэн А. Наумовынаӈ.

Ванык городэн лиги лыӈык вийиӈылг’у накетог’ынав’ уйӈэ ныг’эллыг’у аӈӄак вэтатылг’о то ынныӈийтылг’у.

Ӄонпыӈ 17 ымычвилю йиг’илгык мыткокетог’ыӈнав’ уйӈэ ныг’эллыг’у вэтатылг’о аӈӄак то ынныӈийтылг’у, меӈию акымг’ылика эллай. Ымоӈ г’уемтэв’илг’у аяйтыка итылг’у лиги мыткулӈыӈнэв’, вэтанма аӈӄак уйӈэ ныг’аллай. Эчги ыччу мыткокетог’ыӈнав’- эвыӈ В.Солодов -Мую мынг’ытгымалла, тит кытыл титэ итке ынниг’ан итылг’у аӄаэтгиӈо.Эчги коӈволаӈ вэтатык нытуйӄинэв’ г’ытву, ымоӈ иччету ковэталаӈ тит атвака ныг’итикынэв’ Алвар’ валг’о этгиӈо. Никольский соборык гантывалэнвв’ гыйив’ӄэву тит ӄонпыӈ лиги лыӈык виг’ылг’у вэтанма аӈӄак, меӈию акымг’ылика яяйттыӈ эллай. Гамгаяйичг’о нымэлг’эв’ нытвайкынав’ то ӈаеё мекив’ аӈӄак эчги келлаӈ опта нымэлг’эв’ нытвайкынав’»

Титэ галай минутан в’ъетвыгиӈэн, ӄайнавыткогиӈэн, еӄӄэ ӄыллай аӈӄатайнэтыӈ Авачинский яӈвэтыӈ, тит йилык кийталатылг’о в’ытв’ыто, тит йиччилык мэмлэтыӈ.  Ынниг’ан ӄонпыӈ накокетог’ыӈвоӈнав’ ӈаеё мекив’ акымг’ылика эллай аӈӄаӈӄо вэтатылг’о аӈӄак то ынныӈийтылг’у.

Эчгыпо йинчоччымав’нэн С. Тынанто.

Эчгыпо Камчаткакенав' чав'чываеличг'энаӈ 16.10.2020 г.: https://fareastvip.ru/newswire/detail.php?ID=250589