Эчгыпо Камчаткакенав' чав'чываеличг'энаӈ 16.10.2020 г.

Эчгыпо Камчаткакенав' чав'чываеличг'энаӈ 16.10.2020 г.

16.10.2020 08:24:51 (GMT+12)

Эчгыпо Камчаткакенав' чав'чываеличг'энаӈ 16.10.2020 г.
Пыче итылг’ын вице- губернаторо П. Ясевич эвыӈ: «Ёмакав’гиӈо энаплэпав’гиӈо крайик то инэллэиччет Корякский округкен еллайке тит йингычголавык ёнатгиӈо Корякский округык».

«Министерстван инэллэк гамга чининкинэв’ этгиӈо то инэллэиччет Корякский округкен наконтоӈвав’ӈын мыев’ инэллэчг’э крайик ӄонпыӈ четкеюӈу кулӈыӈнин. «Эчги йиплэпав’гиӈо Корякский округык накотайкыӈвоӈнав’ атав’амтым. Инмы ковэтатыӈ инэллэиччет Корякский округык,ынняӄ коӄлалаӈ катгогиӈо то тэг’и келлаӈ пылв’ынто,в’отэныӈӄо апливэтатка кенӈыволаӈ. В’утку уйӈэ атвыка вэтатылг’о, ятан ӄотэнычг’энаӈ накончоччымав’ӈын тэйкык структуран».-эвыӈ П. Ясевич.

Пыӈыл йиплэпав’гиӈэпыӈ ёнатгиӈо КО нантыванав’ йитг’атвылӈыма омакаӈ инэллэчг’ык крайик. Юнэтылг’у эв’лай, эвыччетке китыӈ вэтгиӈын инллэчг’ин Корякский округык, аму тойчыг’ычг’энаӈ ныг’ыӈвонав’ вэтатык.

П. Ясевич иви,йинтоӈвав’ма нытуйӄин министерстван, Паланык наянпелав’ӈынав’ ымоӈ вэтатвано. Ымыӈ структуран япаёчатыӈ, ятан йитики министерствак. Гамагарайонык яӈволаӈ вэтатык министерстваӈӄо, меӈиныйик наяӈвоӈнав’ лиги лыӈык, миӈкые валг’о аӄайпыгиӈо келлаӈ то наятвэкынав’ чаткаёӈгиӈо миӈкые йиплэпавык муниципалитето округкенав’.

«Ӄыйим мыныннялгытав’нав’ специалистав’ Петропавловскайтыӈ-Камчаткакен. Йиояв’лаӈ гамгарайонык КО вэтатылг’о министерствак. Мыткев’лаӈ,аму нытуйӄин структура мальчаймыӈ йитики ваятыӈ. В’отэныӈӄо мытынв’аняванав’ инэллэчг’у районкэнав’. Ыччу эв’лай, титэ инэллэиччет итти Паланык, мэлюйӈэ омакаӈ авэтатка. Эчги тойчыг’ычг’энаӈ наянтыванӈын вэтгиӈын. Мыткомычв’ыналлаӈ, ымыӈ вэтгиӈыно ягычголаллаӈ»,- эвыӈ П. Ясевич.

Эчгыпо йинчоччымав’нэн С. Тынанто.

Эчгыпо Камчаткакенав' чав'чываеличг'энаӈ 15.10.2020 г.: https://fareastvip.ru/newswire/detail.php?ID=250588