Эчгыпо Камчаткакенав' чав'чываеличг'энаӈ 15.10.2020 г.

Эчгыпо Камчаткакенав' чав'чываеличг'энаӈ 15.10.2020 г.

15.10.2020 08:46:04 (GMT+12)

Эчгыпо Камчаткакенав' чав'чываеличг'энаӈ 15.10.2020 г.
Витку ат ӈэвэӄ экмитык 20 гэвэгиӈо Камчаткайтыӈ етти Генеральный прокурор РФ. Петропавловскак-Камчаткакен ынан тэйкынин йитг’атвыӈыгиӈо омакаӈ етылг’ыйик г’уемтэв’илг’ык то опта лыг’увылӈи вэтатылг’ыйик прокуратурак Камчатский крайик.

13 г’уемтэв’илг’у яллай панэнатвык эналлачг’ыӈ прокуратурак. Ӄуччев’ ыяваӈӄо ынкыӈ в’анявалай видео-этгиӈэпыӈ.

Мыкъян энапӈылав’гиӈо эллай яялг’атгиӈыкъет. Йиннялгытыкъет петыяяӈӄо, тит ныг’итикынв’ яяв’ социальный этгиӈпыӈ, мальӄэв’в’аӈ наков’ъепӈывоӈнав’ мыкпыкъялг’о яяв’, то явытгыё -натвынав’ юнэтылг’э. Опта напӈылон ымыӈ социальный в’иннетыкъйит, натвынав’ аӄайпыгиӈо лекарствакъет то йиг’этыкъет. Опта нивын, юлэӄ накотайкыӈвоӈнав’ расследованияв’ ӈэвэӄ эӄэлг’у накояёӈнав’ в’отӄыяйтыӈ.

Гамга энапӈылав’гиӈэпыӈ вийиӈык юнэтылг’у ынанмэйӈычг’ын прокурор эвыӈ тит инг’э нанг’ыӈвонав’ йичечг’атгиӈо. Ымыӈ ыннею нэегитэйкынэв’ иччетык Генпрокуратурак. То наятвыӈын вэтгиӈын прокуратуракен Камчатка.

В’аняванма вэтатылг’ыйикыӈ бизнесык мэйӈычг’ын прокурор эвыӈ, нымэлӄинэв’ вэтгиӈо йильпыквылг’эн, опта келлаӈ в’эннятниӈо йиплэпавык ДВ. То ымыӈ тайкыев’ йиллыг’у инэллэчг’э нэнг’ытилийкынэв’ социально-экономикакенав’ акметгиӈо.

Игорь Краснов опта итти иччетык вэтатылг’эн прокуратурак крайик.Ӈанко танвэтгыӈлай миӈкые амъел вэтатык.

«Яноткенав’ чаткаёӈгиӈо келлаӈ яёг’ыӈкы тайкыев’ йиллыг’у Президентата йиплэпавык то тит итке аӄаэтг’иӈо умкылв’ынык»,эвыӈ ынно.

Ныкытыг’ав’ гитэк, миӈкые накояваӈнав’ пылв’ынто национальный тайкыёлӄылэн.

Генпрокурор эвыӈ. тит ӄонпыӈ нэнг’ыгитэйкынэв’ социальный пыӈлов’- вэеӈгиӈо кымиӈин, мыккымиӈылг’ыяйичг’эн , вэтатылг’эн то ӄуччев’. Тывынэн эняччыгиӈо вэтыкъет.

Эчгыпо йинчоччымав’нэн С. Тынанто.

Эчгыпо Камчаткакенав' чав'чываеличг'энаӈ 14.10.2020 г.: https://fareastvip.ru/newswire/detail.php?ID=250585