Эчгыпо Камчаткакенав' чав'чываеличг'энаӈ 21.09.2020 г.

Эчгыпо Камчаткакенав' чав'чываеличг'энаӈ 21.09.2020 г.

21.09.2020 08:39:08 (GMT+12)

Эчгыпо Камчаткакенав' чав'чываеличг'энаӈ  21.09.2020 г.
Ымроссиякен кычав'четгиӈын галай ванык нынылг'этылг'ын В. Фатьяновын Петропавловскак - Камчаткакен. Ынан мыкыӈ валг'ык ячвыӈчатгиӈык кылавылг'атык эллай 1050 юнэтылг'у чывиптык илиилык. Ынан нив'лыӄин йиг'эт, 12 км, галанэн аймата крайик В. Сододовынак.

"Ольвыльг'атгиӈын тыттель нымэлӄин! Янот гынунык йиг'этык, тэӄын коплитколаӈ катгогиӈо, то тэӄын ёнатгиӈык китыӈ в'аняв' "кытаван тэйкык", то гынунык кычав'чейгиӈык г'уеви ӈыеӄэв'кин в'ыеӈтон, - эвыӈ В. Солодов.- Ӄайлим, кылавылг'а увикив' наков'энняӈывоӈнав', ымыӈ в'эйчитэ лэлг'у наконэв'эчанӈывоӈнав', наконв'аняванӈынав'. Яноткен этгиӈын - ыннин китыӈ льгеангыт, мыев' мую омакаӈ. В'утку ымыӈ юнэтылг'у, кымиӈу, ынпычг'у, спортсменав'. Кылавылг'ыллай, ӄэй муӄэти! "

Витку Камчаткак ячвыӈчатгэма унмык гэчг'элин ӈайӈынон, йуӈэ ван еӄӄым эняччыка итти, эв'ынчам яллай гайматылг'о кылавылг'атык.

"Ыннею кычав'чейгиӈо Камчаткак наӈвонав' 2004 г., келлаӈ 17. Ячвыӈчалай мыкыӈ тысячан г'уемтэв'илг'у. Ымыӈ ею галалай нымэлг'эв'. Ӄайлим йиг'эт еӄӄым энг'эӄэчгуӈэв'кэ муӄэтэ. Ёнатылг'ыйикыӈ ыннею кычав'четгиӈо ныг'аллай ег'атгиӈо",- эвыӈ пыче итылг'ын инэллэчг'у спортакенак этгиӈэпыӈ крайик К. Хмелевский.

Эчгыпо йинчоччымав'нэн С. Тынанто