Эчгыпо Камчаткакенав' чав'чываеличг'энаӈ 18.09.2020 г.

Эчгыпо Камчаткакенав' чав'чываеличг'энаӈ 18.09.2020 г.

18.09.2020 09:17:40 (GMT+12)

Эчгыпо Камчаткакенав' чав'чываеличг'энаӈ 18.09.2020 г.
Камчаткак амъел малеёчга нэкупъйиӈнэв' энанг'отав'гиӈо вэтгиӈык культурак. Янот ӈыволай вэтатык вано, миӈки каликалу наков'ъепӈывоӈнав' то музеё, эчги накоӈвоӈнав' йинв'эӈэтык театр то филармониян. В'уткекьйит в'аняватэ пыче итылг'ын инингиву инэллэчг'ин Инэллэиччетык крайик  В. Сивак.

Камчаткакен иччет филармониякен то театр пыче ӈыволай вэтатык лиги лыӈма этгиӈо аӄачыг'ычгиӈыкъет.

"В'алэлӈатылг'ыйикыӈ то артистайикыӈ китыӈ нымэйиӈӄин ег'атгиӈын, - иви пыче итылг'ын инэллэчг'у культурак крайик С. Айгистова. - Эчги вэтатылг'о культурак гачоччымав'лэнав', тит нэетикынэв' в'алэлӈатылг'о: ычгин вэтгиӈын нэтэйкын, тит антыгэватка эчгикинэв' этгиӈо аӄачыг'ычгиӈыкъет то ымыӈ нытгипъав' итык".

Региональный инэллэиччетык культурак янъя накогэтаӈвоӈнав' этгиӈо, тит ныг'итикынэв' ымыӈ ею в'алэлӈатылг'ыйикыӈ, меӈию коянӈыволаӈ творческий ванэтыӈ, вийиӈык увикив' тыг'ылгиӈыӈӄо.

"Ӈэвэӄ уйӈэ кенӈыволаӈ етылг'ин г'ыӈытг'ымъайпинӈу, ымыӈ ею йинчоччымавык тит яӄам ынки нэнг'ийкуйикынэв' ымыӈ г'иӈытг'ымъайпинӈу то йинмытык мынго. То в'алэлӈыванык эмэлкэ ятан ныг'ытвайкынав' 50 г'уемтэв'илг'у", - эв'лай инэллэчг'у культуракенав' крайик.

Тит ыннэникэ амкатка г'уемтэв'илг'у, билето гамга в'алэлӈатгиӈэтыӈ лыгу нэнг'ийкуйикынэв' дистанционный этгиӈэпыӈ официальный сайтык итылг'у театрак то филармонияк.

*

Нымэлӄин кытгемгиӈын китыӈ эняччыгиӈо аӄачыг'ычгиӈыӈ COVID-19 - гаяйтаӈӈывота увикив'.

Ӄонпыӈ ганмытӈывота мынго, мылата конмыӈнэн ымоӈ микробав'.

Гаяваӈвота г'иӈытг'ым айпиньӈу то ыннеӈчеӈ эпылг'о йилгылилив', тит увикив' яйтаӈык то ӄуччев' атг'ылпэнника.

Ӄонпыӈ ганмытӈывота мынго антисептиката кымг'ылэма вэлиткояӈӄо, лайвыгиӈыӈӄо.

Кытыл чеймык итке ӄутин г'уемтэв'илг'ык 1,5 - 2 метрав', титэ миӈки котваӈволатыӄ  ӈэвэӄ ӈынвыӄ г'уемтэв'илг'у котвалаӈ.

Эчгыпо йинчоччымав'нэн С. Тынанто.Эчгыпо Камчаткакенав' чав'чываеличг'энаӈ 17.09.2020 г.: https://fareastvip.ru/newswire/detail.php?ID=250507