Эчгыпо Камчаткакенав' чав'чываеличг'энаӈ 14.08.2020

Эчгыпо Камчаткакенав' чав'чываеличг'энаӈ 14.08.2020

14.08.2020 08:04:43 (GMT+12)

Эчгыпо Камчаткакенав' чав'чываеличг'энаӈ 14.08.2020
Видеов'аняватгиӈэпыӈ Президент Россиякен Владимир Путин йитг'этвылӈэти омакаӈ пыче итылг'ык инэллэчг'у Камчаткакен В. Солодовынак. Ычгынан натанвэтгыӈнав' яноткенав' социально-экономикакенав' энаплэпав'гиӈо регионкенав'.

В. Солодовынак тывынэн Президентанаӈ РФ, миӈкые яӈвоӈ вэтатык тит йинмэйӈэвык таяӈгиӈо Камчаткак.

В. Солодовынак в'аӈланэн в'эннятгиӈо ынангычголовалг'эн айманэн государствак тит мэльинг'э нанг'ыӈвонав' таяӈкенав' вэтгиӈо Вилючинскак.

В.Путинынак мэлу лыӈнин в'аӈлагиӈо пыче итылг'ин инэллэчг'у Камчаткак тэйкык нинг'ыӄин интернет айгытӄыӈӄал нотаг'эӈыткынык.

В. Солодовынак панэнатвынэн Президентанаӈ миӈкые кочоччымав'лаӈ йитг'этык 75 гэвэгиӈо Курильский десантэн.

Президентата лыг'унин ынаннымейиӈӄин аӄайпыгиӈын : "Инмы пылв'ынтогиӈо юнэтылг'ин Камчаткак кытвыль ныг'итикынэв'. 8 ваны китыӈ ӈэвэӄ экмитык майӈынутэнут. Ынняӄ еӄӄым ныгычголӄэнав' вэлатгиӈо кэняччыӈволаӈ. Ынкекьит коӄланӈыволаӈ юнэтылг'у пылв'ынтыӈ. Эчги ныкыттыг'ав' нэнг'ыгитэнэв' ӈаеё иччету меӈию монополистано наколӈыӈвоӈав'. Лиги тыкулӈыӈнэв' этгиӈо, меӈию кеняччыӈолаӈ, ӄыйим ымыӈ мыйилӈынав'. Омакаӈ антимонопольный вэтатылг'ык ныг'ынчэчг'аллагыткы гэеӄлинэв' тыттель ныгычголӄэнав' вэлатгиӈо".

*

Йитг'атвылӈыгиӈын Президентан РФ омакаӈ пыче итылг'ык инэллэчг'у Камчаткак В.Солодовынак йинг'уевеннин эняччыгиӈо итылг'у регионык. Ынаняноткен китыӈ амъел тайкыгиӈын краевой малав'ъян. Ыннин чаткаёӈгиӈын тывынэн ТАСС инэллэчг'э Институтык региональный аӄайпыгиӈэпыӈ Д. Журавлёвынак.

Камчаткаӈ ныг'итикынэв' федеральный в'эннятгиӈо, мыев' опта регионык котгыманӈыволаӈ чинин ею тэйкык, тит йиплэпавык ёнатгиӈо. Эвыӈ Д. Журавлёв. "Федеральный в'эннятгиӈо ӄонпыӈ ныг'итикынэв'. Ыннею келлаӈ энанг'ояватгиӈо миӈкые инэллэчг'у кочаӈг'ачанӈыволаӈ ваятыкъет".- эвыӈ итылг'ын экспертано.

Эчгыпо йинчоччымав'нэн С. Тынанто.

Эчгыпо Камчаткакенав' чав'чываеличг'энаӈ 13.08.2020: https://fareastvip.ru/newswire/detail.php?ID=250359
Люди увидели перспективу

15.09.2020 14:35:31 (GMT+12)

Люди увидели перспективу

Дни рождения в этом месяце
Парламентская ассоциация «Дальний Восток и Забайкалье»
Far East: Who is Who