Эналватылг’о эняечема нынны вагалынэн Паланык Камчаткак ныг’эли Макар Обухов

Эналватылг’о эняечема нынны вагалынэн Паланык Камчаткак ныг’эли Макар Обухов

04.07.2022 10:20:31 (GMT+12)

Эналватылг’о эняечема нынны вагалынэн Паланык Камчаткак ныг’эли Макар Обухов
Акметгиӈо меки ныг’эли эналватылг’о эняечема нынны вагалынэн Паланык, лиги лыӈылг’ын г’уемтэв’илг’ин то эӈг’элу лыӈылг’ын, тывынэн инэллэчг’э крайик В. Солодовынак ангытыткома 15 гэвэгиӈо титэ ӈывой итык нытуйӄин субъект.

Ынан мыкыӈ кумӈу юнэтылг’э Камчаткак нэйилнэв’ М.М. Обуховынаӈ-906. Ынно ӈынвыӄ вэтатэ советский государственный то партийный инэллэиччетык, виткукин инэллэчг’ын исполкомык Корякский окружной Советык тыӈивылг’ин ваятэн.

«Ӄайлим юнэтылг’э чинин натвыгаг’ын ыннин ӈывогиӈын. Тыкивыӈ, тыттэль эмэлкэ, мыев’ вагалына яявайкынэн нынны лиги то эӈг’элу лыӈылг’ин юнэттумгин. Танынныӈгиӈын итти ваятэн. Чинин юнэтылг’у вэтгыльг’алай, тит вагалыны Паланык нэнг’ытэнынныӈын Макар Михайлович Обухов.Тыкопоздравлянӈынав’ юнэтылг’у Паланык, Корякский округык то Камчатский крайик в’уткекъйит»,- иви В. Солодов.

729 юнэтылг’э нэйичин йиӈэльг’этылг’ын итылг’ын Героё РФ , О. Е. Мутовинынаӈ.

524 кумӈу нэйилнэв’ каличитык метычг’ыӈ Г. Г. Поротовынаӈ, 490- калимитычг’ыӈ В. В. Косыгинынаӈ ( увик лыӈнин Коянтоно), 359- митытватычг’ыӈ мылавык, йинтоӈвавылг’ын мылав’ъиччет «Мэнго» А. В. Гиль.

Тит тэнынныӈкы вагалыны Паланык в’анявалай чинин юнэтылг’у. Инэллэчг’э мэлу лыӈнин ыннин ӈывогиӈын.

Тит лиги лыӈык:

Макар Михайлович Обухов (16.03.1902-31.12.1952) итти советский государственный то партийный вэтатылг’о, итти Ымваятэн таӈычейтгиӈык, виткукин инэллэчг’ын Корякский окрисполкомык (1930-1952).

Итти партияк лыӈылг’ын большевико, ӈанко ӈывой итык 14 гэвэгиӈыӈӄо. Йиллэнин в’инвэ партиякэн вэтгиӈын Двльний Востокык. Титэ галай чыӄъивив’ йиг’илгык революциян 1917 г ныг’эли тыӈивылг’у ваятэн Корякский районык. Тэнмыталойиг’илгык 1917 г.-инэллэчг’ын Корякский иччетык большевиков.

Титэ итти Майӈы Октябрьской Социалистический революциян вачче комиссаро. Омакаӈ Ф. Э. Дзержинский вэтатэ йинтоӈвавык Всероссийский Чрезвычайный Комиссиян. ӈывома тэнмыталойиг’илгын 1918 г. йинтоӈвав’нэн Виткукин Луганский социалистический иччет, меӈинынэк ӈывонэн вийиӈык Харьков пенилг’ын германо-австрийский таӈычейлиг’а.

Энма Ымваятэн танӈычетгиӈын- йиллэнин Корякский иччет советский вийиӈычг’ин Дальний Востокык. Опта итти иччетык Реввоенсоветык Дальневосточный республикак.

1923-1926 гг.- вэтатэ секретарё Карагинский сельсоветык, то 1926-1931 г-инэллэчг’ын Карагинский сельсоветык. 1931-1932 - итти инструкторо, то секретарё комитетык Карагинский районный Советык (Камчатский областяк).

10 яяв’очг’ыйиг’илгык 1930 гэвэгиӈык нэйичин виткукинэну инэллэчг’у Корякский окрисполкомык.

Майӈытанӈычейма итти Государственный комитетык оборонык. Макар Михайлович итти тыӈивылг’у ваятэн Верховный Советык СССР 1-3 созывык. Опта итти тыӈивылг’у ваятэн Хабаровский краевой, Камчатский областной то Корякский округкен Советык тыӈивылг’ин ваятэн.

В’уткекьйит панэнатвылай эначгыпавылг’о инэллэчг’ин то Инэллэиччетин Камчатский крайик.

Эняннимэв’нэн С. Тынанто