Анна Ковалык: Йинчоччымав’гиӈын тэнмытэн законэн айгытӄываятыкъет Камчаткакэн ныг’эли яноткэнано этгиӈыӈо 2021 гэвэгиӈык

Анна Ковалык: Йинчоччымав’гиӈын тэнмытэн законэн айгытӄываятыкъет Камчаткакэн ныг’эли яноткэнано этгиӈыӈо 2021 гэвэгиӈык

10.01.2022 09:48:29 (GMT+12)

Анна Ковалык: Йинчоччымав’гиӈын тэнмытэн законэн айгытӄываятыкъет Камчаткакэн ныг’эли яноткэнано этгиӈыӈо 2021 гэвэгиӈык
Галалг’ыгэвэгиӈык крайик галалай амалваӈ валг’о этгиӈо айгытӄываятэн,юнэтылг’ин Камчаткак. Пылв’ынто эллай краевой бюджетыӈӄо.

«Камчатка китыӈ вано миӈки чененкечг’энаӈ коёналаӈ то ковэталаӈ айгытӄываято РФ. Яноткенано этгиӈо галалг’ыгэвэгиӈык ныг’эли йинчоччымав’гиӈын тэнмытэн законэн, меӈин тывынэн инэллэчг’э регионык В. Солодовынак, тит натоӈватын закон Камчатский крайик «Йинвэтатавык то вийиӈык катгогиӈо айгытӄываятэн итылг’у Айгытӄыӈӄалыӈӄо, Сибириӈӄо то ДВ Россияк, юнэтылг’у Камчатский крайик». В’уткекьйит вэталлай мыкыӈ гэвэгиӈын. Опта натвынав’ чининкинэв’ чаткаёӈгиӈо ӈынвычгая г’уемтэв’илг’э, то нэннийнэв’ мыкыӈ 500 чининкинэв’ танвэтгыӈгиӈо то инэгэю. Эмэт тэнмытэн законэн мэлу нэлӈыгэг’ын общественный иччетэ айгытӄываятэн. Яяв’очг’ыйиг’илгык нэннийин Законодательный Омакатыӈ Камчатский крайик.

Танвэтгыӈыӈӄо инэллэчг’ин Камчаткак, 2022 гэвэгиӈын нэлӈын Гэвэгиӈо культуракэн айгытӄываятэн, юнэтылг’ин Камчаткак. Эмэт котваӈ тэнмытэн, миӈки натвынав’ этгиӈо тит яйтаӈык культуран айгытӄываятэн»,- эвыӈ инэллэчг’ын миӈки накогэтаӈвоӈнав’ йиплэпав’гиӈо гражданский этгиӈэпыӈ, тойваятэн, эначгыпав’кенав’ вэтгиӈо А. Ковалык.

Яёг’ыӈкы тайкыён «Йиплэпав’гиӈо ымыӈ ею айгытӄываятэн, юнэтылг’ин Камчатский крайик» государственный тайкыёлӄылэн «Яёг’ыӈгиӈо государственный гамгаваятэн политикан то томгылг’атгиӈо Камчатский крайик» краевой бюджетык 2021 гэвэгиӈык ганчоччымав’лэнав’ 34 миллионав’ пылв’ынто. В’утинэтэ нэв’инненэв айгытӄылг’у тэйкык вэтгиӈо ченэнкэчг’энаӈ.
Вэтгиӈыкъет «Йинтуйтывэвык то йиплэпавык вэтатъявэнаӈо эччатыӈ вэтатылг’о чененкечг’энаӈ» эллай 3,5 миллионав’. Муниципальный бюджетыӈӄо эллай в’эннятгиӈо 21 яйичг’ыэччатылв’ыныӈ айгытӄываятэн.

«Тит йилык инэнмэлэв’кинэв’ то социальный в’эннятгиӈо» нэтилинэв’ вэтгиӈо: 38 айгытӄылг’у натав’анныӈнав’, нэв’инненэв’ йиӈлык эв’эчэгиӈын 206 айгытӄываятыӈ.

Краевой бюджетыӈӄо РОО «Ассоциациян айгытӄываятэн Камчатский крайик» налпыӈъйинав’ пылв’ынта грантаӈӄо, тит нэв’иннетикынэв’ энанмалав’гиӈэпыӈ, социальный пыӈлойпын айгытӄываято, юнэтылг’у Камчатский крайик (ятан уйӈэ эв’иннеткэ Елизовский районыӈӄо, Вилючинскаӈӄо, то Петропавловск- Камчатский)титэ наконӈэвыӈвоӈнав’ энанмалав’ъэччатыӈ 2021 гэвэгиӈык.

Тит йингычголавык энангыёлав’гиӈо айгытӄываятэн опта кытвыль наков’эннянӈывоӈнав’.
Эллай пылв’ынто тит йинкымг’ыливык вэлатгиӈо йиг’этэн яйгочав’ӈылӄэвэтыӈ айгытӄываятыӈ ейгучев’ӈылг’ин КГПОБУ «Паланкэн колледжан» то «Камчатский медицинский колледж» итылг’у Паланык. Нэвилэнэв’ 506,65 тысячав’ пылв’ынто 19 студентайикыӈ. Опта наконкымг’ылэв’ӈывоӈнав’ чымӄып вэтлатгиӈо яйгочав’ӈылг’ыйикыӈ гынункин, ынангычголкэн яйгочав’ӈыиччетык. То наковэланӈывоӈнав’ йиг’это миӈки кояйгочав’ӈылаӈ. 36 студентайикыӈ нанкымг’ылив’нав’ пылв’ынто йиг’этыкъет 2 058236, 80 тыс.пылв’ынто.
Краевой бюджетыӈӄо нанпыльв’ынтов’нав’ ӄуччев’ этгиӈо культуракэнав’, ымыӈ тыӈэвылг’ыйикыӈ IX съездайтыӈ айгытӄываятэн Салехардык, IV омакатынвыӈ айгытӄываятэн Камчатский крайик то ӄуччев’.

«11 кытэплёйиг’илгык галай краевой ячвыӈчатгиӈын «Ынаннымэлӄин яйичг’ыиччет айгытӄываятэн, юнэтылг’ин Камчатский крайик». ӈыччеӄ яйичг’ыиччетыт нанойпакменнат. Ынней кинӈи «Камаку»(Русалка) то «В’энӄой»(Важенка).

Ойпакметпылв’ынто 2021 гэвэгиӈык эллай 250 тысячав’ пылв’ынто»,-иви Анна Ковалык.

В’уткекьйит панэнатвылай эначгыпавылг’о инэллэчг’ин то Инэллэиччетин Камчатский крайик.

Эняннимэв’нэн С. Тынанто
Итоги года «Забрабочего»

26.01.2022 19:12:55 (GMT+12)

Итоги года «Забрабочего»