Ныкъёӄэн ев’в’эн интернэтэн яӈвоӈ итык Тигилик, Паланык то Оссорак чеймык валг’ык ӈыччеӄ гэвэгиӈык

Ныкъёӄэн ев’в’эн интернэтэн яӈвоӈ итык Тигилик, Паланык то Оссорак чеймык валг’ык ӈыччеӄ гэвэгиӈык

08.09.2021 09:10:49 (GMT+12)

Ныкъёӄэн ев’в’эн интернэтэн яӈвоӈ итык Тигилик, Паланык то Оссорак чеймык валг’ык ӈыччеӄ гэвэгиӈык
Инэллэчг’ын Камчатский крайик В. Солодов то мейӈычг’ын иччетык ООО «ИнтерКамСервис» К. Рябцев вэтгыльг’атгыг’э то накалинпын омакаӈ валг’ын вэтгиӈын, тит крайик навэтатэкынав’ тайкыёлӄыло телекоммуникациякенав’.

Калэнпынтватгиӈык итти инэллэчг’ин йиплэпав’гиӈэпын Дальний Восток то Арктикан А. Чекунков. Иччет «ИнтерКамСервис» эмет чоччымавэ ӈывок тэйкык Камчатский крайик волоконно- оптический ев’в’эн меӈин йитики «Эссо(В’анав’ӈай)-Усть-Хайрюзово- Тигиль-Палана- Оссорак» ыннин эв’лыгиӈын йитыӈ 800 километрав’, то опта наяӈвоӈнав’ йинтыватык вано технологияӈӄо Passive Optical Network тит ымоӈ яев’в’эв’ гамгав’уйвыкинэв’ ныг’итикынэв’  галалг’ыг’элилӈык ВОЛС.

«Омакаӈ валг’о вэтгиӈо келлаӈ Камчаткаӈ нымэлӄинэв’ этгиӈо. В’утин калэнпыгиӈа мыткотанвэтгыӈлаӈ тэйкык оптиковолоконный ев’в’эн айгытӄыӈӄалэтын, ыявайтыӈ районэтыӈ Камчатский крайик тайкыёлӄылэпыӈ Президентан РФ, меӈин йилнин гэвэгиӈын явалэтыӈ. Пылв’ынто йнчоччымав’нэн чининкинэв’ инвесторо лыӈылг’э, то мальтэг’и пылв’ынто келлаӈ краевой бюджетыӈӄо. Ыннин китыӈ нымэлӄин энангыеватгиӈын, миӈкые ёг’ык национальный тайкыёв’, тит ымыӈ миӈки нэг’уевикынэв’ нымэлӄинэв’ телекоммуникацияв’ то аявака ӈынвыӄ бюджетный пылв’ынто, мыев’ ков’эннялаӈ инвесторо. Ӄайлим келлаӈ ынниг’ан валг’о в’эннятгиӈо. Мую мыткомычв’ыналлаӈ, аму 2023 гэвэгиӈык интернет йиг’уевыӈ Оссорак, 2022 гэвэгиӈык- Паланык то Тигилик. Ыннин китыӈ юлэӄ уг’этылг’ын этгиӈын, меӈин наяӈвоӈын тэйкык»,- эвыӈ В. Солодов.

«Тыкопозравлянӈынав’ юнэтылг’у айгытӄыӈӄал крайик, мыев’ эчги мытакмэлан тайкыён омакаӈ вэтатык иччет ООО «ИнтерКамСервис» то инэллэиччет Камчатский крайик. В’уччин тайкыёлӄыл тыттель ниччыӄин ымыӈ технический вэтгиӈэпыӈ то энаев’латгиӈэпыӈ. 2023 гэвэгиӈэтын мойик эччатыӈ йитики яноткенано вэтгиӈо. Омакаӈ ив’лыев’в’эк, меӈин китыӈ 800 км, ёнатылг’ыйикыӈ еллайкэ нытуйӄинэв’ этгиӈо интернетэн гамгав’уйвык, мекию гатвылэнав’ тайкыёк»,- эвыӈ К. Рябцев.

В’уткекьйит панэнатвылай эначгыпавылг’о инэллэчг’ин то Инэллэиччетин Камчатский крайик.

Эняннимэв’нэн С. Тынанто.