Ойпакмето ёнатылг’ыйикыӈ Камчаткак

Ойпакмето ёнатылг’ыйикыӈ Камчаткак

22.07.2021 07:52:59 (GMT+12)

Ойпакмето ёнатылг’ыйикыӈ Камчаткак
Эначгыпавылг’о калечелай, г’уеви эӈг’элгыйив’ӄэв’ «Малвэтгиӈыкъет йиплэпавык Корякский округ», йинтоӈвавылг’ын тыӈивылг’э ваятэн Законодательный умэкэтык Камчатский крайик. Ыннин ойпакметгиӈын нантоӈвавын, мыев’ итти тайкыёлӄыл инэллэчг’ин крайик В. Солодовын, меӈин йилнин тэлэма омакальг’атгиӈын Паланык пылиткома ымычвилюйиг’илгын 2020 гэвэгиӈык.

Инэллэчг’ын аппаратык инэллэчг’ин то Инэллэиччетин Камчатский крайик С. Меркулов иви: «В’аняватгиӈэпыӈ инэллэчг’ин крайик нэтэйкын вэтгиӈын тит йинтоӈвавык ыннин ойпакмэт- «Малвэтгиӈыкъет йиплэпавык Корякский округ». Вэтатъиччэтэ нэтэйкын пэягиӈын гыйив’ӄэвин то положениян ойпакметгиӈэн. Омакальг’анма краевой тыӈивылг’ин ваятэн нэкминэв’ инэгэю законэтыӈ Камчатский крайик «Ойпакметгиӈыкъет». В’уччин ойпакмэт йитики ӈанэныйикыӈ, меӈию гымаллай метг’аӈ вэтатык йиплэпавык Корякский округ. Ыннин ойпакмэт йитики ӈанэныйикыӈ, микычгин эмет котвалаӈ ойпакмэто федеральный, региональный то муниципальный эччатыӈӄо».

Гемгетгивик наянойпакменӈывоӈнав’ мыллыӈычгаё г’уемтэв’илг’у. Опта йитики ойпакмэт пылв’ынта, меӈию келлаӈ 50 тысяч рублив’.

Ойпакмэт нэейилики ангытыткома Г’ылв’ий Корякский округэн 10 яяв’очг’ыйиг’илгык.

Камчаткак котвалаӈ ойпакмэто малвэтгиӈыкъет  гамга вэтатъиччетылв’ынык.

Гантоӈвав’лэнав’ ойпакмэто:
• Ынан гычгол валг’ын гыйив’ӄэв’ Камчатский крайик «Малвэтгиӈыкъет Камчаткак»;
• Гычгол итылг’ын нынылг’атгиӈын Камчатский крайик «Эӈг’элу лыӈылг’ын юнэтылг’ын Камчатский крайик»;
• лиги лыӈылг’у нынылг’атгиӈо «Лиги лыӈылг’ын ынныӈийтылг’ын», «Лиги лыӈылг’ын ӄояв’ъепылг’ын», «Эньпичичгин малгиӈын Камчаткакен»;
• почётный гыйив’ӄэву крайик: «Метг’авэтатыкъет Камчатский крайик»; «Г’аӈг’алгиӈын Камчаткаӈ»; «Мычв’ынатгиӈын Камчаткакен»; «Гымвэтгиӈыкъет йиплэпавык законодательстван то парламентаризм Камчатский крайик»;
Опта ёнатылг’ыйикыӈ Камчаткак кенӈыволаӈ почётный грамотав’ краевой парламентаӈӄо то Эналлаэччатыӈӄо Камчатский крайик, медалё Камчатский крайкэнав’, дипломо Камчатский краен, государственный премияв’, ӄавеёчго губернаторэн то тыӈивылг’ин ваятэн.

В’уткекьйит панэнатвылай эначгыпавылг’о инэллэчг’ин то Инэллэиччетин Камчатский крайик.

Эняннимэв’нэн С. Тынанто.
Дни рождения в этом месяце
Парламентская ассоциация «Дальний Восток и Забайкалье»