Камчаткак Пенсионный фондата Россиякен нэкувилэнӈынэв’ в’эннятгиӈо, ӈэвэк уйӈэ ныг’аллай эньпичив’ метке ыллыг’о, аянма самолёт Ан-26

Камчаткак Пенсионный фондата Россиякен нэкувилэнӈынэв’ в’эннятгиӈо, ӈэвэк уйӈэ ныг’аллай эньпичив’ метке ыллыг’о, аянма самолёт Ан-26

20.07.2021 09:00:17 (GMT+12)

Камчаткак Пенсионный фондата Россиякен нэкувилэнӈынэв’ в’эннятгиӈо, ӈэвэк уйӈэ ныг’аллай эньпичив’ метке ыллыг’о, аянма самолёт Ан-26
Ыннею пылв’ынтыв’эннятгиӈо келлаӈ ӈанэныйикыӈ, меӈию еппы авэтаткылг’энав’ яйичг’ык, миӈки уйӈэ ныг’аллай ӄайтумгу,аянма самолёт то маӈэныйикыӈ келлаӈ 18 гэвэгиӈо ам 23 гивив’, ӈэвэӄ кояйгочав’ӈылаӈ г’ыло.

«Гэтатама мекыйикыӈ ныг’итикынэв’ в’эннятгиӈо, мыев’ уйӈэ ныг’аллай ӄайтумгу аянма самолёт, келлаӈ 20 кымиӈу то туйчыг’у. В’отэн г’ылойтыӈ эмет нанчоччымав’нав’ 10 пенсияв’. Ыннею пенсияв’ эмет наӈвонав’ йийийк 19 льгэалайиг’илгык. Ватӄэнав’ ӄайтумгу калечелай Пенсионный фондайтыӈ 19 льгэалайиг’илгык. Ӈыячгаё коёналаӈ ӄутиннутэк РФ. Ыччу якалечеллаӈ, тит ийкыӈ ныг’итикынэв’ в’эннятгиӈо ӈанко, миӈки ыччу коёналаӈ- в’уйвык Москва то Пенза. Гамгаг’уемтэв’илг’ык яӈъя вэталлай в’иннетычг’у фондакенав’»,-иви инэллэчг’ын иччетык Пенсионный фондакен Камчатский крайик Т. Мелехина.

В’утин самолётык опта итгыг’и ӈыечгэйи авэтаткылг’энат пенсионерыт, ыйик ӄайтомгыйикыӈ нэевилэнӈынэв’ пылв’ынто Пенсионный фондаӈӄо, тит улгывык.

Этг’у ыннэн в’эннятгиӈын ӈанэныйикыӈ, меӈинычгин уйӈэ ныг’аллай ӄайтумгу аянма самолёт- йимав’кин пенсиян, меӈин китыӈ, мыев’ эллай страховой йимкав’гиӈо. 23 г’уемтэв’илг’ин, меӈию уйӈэ ныг’аллай эллай страховой йимкав’гиӈо. 12 г’уемтэв’илг’ин ыннею йимкав’гиӈо эллай негосударственный Пенсионный фондак, ам 11 г’уемтэв’илг’ин- Пенсионный фондак Россиякен.

Гамгаӄайтомгыйикыӈ нэннийнэв’ калив’, тит энма 6 йиг’илгу, галама аӄаэтгиӈын самолётэн, ӄайтумгу накаличиннав’ Пенсионный фондайтыӈ, тит ийкыӈ ныг’итикынэв’ йимкав’гиӈо пенсиякенав’.
Самолётык, меӈин аяти Палангэӈкы эллай 28 г’уемтэв’илг’у.

Инэллэчг’э В. Солодовынак йилнин тайкыён, тит инг’э нэнг’ывилэннэв’ пылв’ынтыв’эннятгиӈо ӄайтомгыйикыӈ, меӈинычгин уйӈэ ныг’аллай ӄайтумгу аянма самолёт. Инэллэиччетэ крайик натанвэтгыӈнав’ этгиӈо, тит вэтатылг’о инэллэиччетык крайик нэв’иннетикынэв’ ымоӈ ӄайтомгыйикыӈ яӈъя, меӈинычгин уйӈэ ныг’аллай ӄайтумгу аянма самолёт. Тит ымоӈ ею ычгинэв’ лиги лыӈык, то йилык в’эннятгиӈо.

В’уткекьйит панэнатвылай эначгыпавылг’о инэллэчг’ин то Инэллэиччетин Камчатский крайик.
Дни рождения в этом месяце
Парламентская ассоциация «Дальний Восток и Забайкалье»