Камчаткак галай умэкэт партиякэн «Ыннэн валг’ын Россия»

Камчаткак галай умэкэт партиякэн «Ыннэн валг’ын Россия»

11.06.2021 08:21:34 (GMT+12)

Камчаткак галай умэкэт партиякэн «Ыннэн валг’ын Россия»
Яноткэн умэкэт Камчаткакэн региональный Ымроссиякэн иччетин «Ыннэн валг’ын Россия» галай Петропавловск- Камчаткакен 8 алайиг’илгык. В’утку эллай итылг’у политсоветык, иненчичг’этъиччетык то тыӈивылг’у 14 эччатыӈӄо ымоӈ Камчаткаӈӄо, омакальг’аллай мыкыӈ 100 г’уемтэв’илг’у.

Натанвэтгыӈнав’ акметгиӈо ӄонӄал валг’эн эняечегиӈэн, то нэгитэнэв’ янотычг’о, меӈию наяӈвоӈнав’ йинчоччымавык эняеченвэтыӈ ӈэйӈэйик в’утин гивик.

«Ӄайлём, ӈанэныйикыӈ мекив’ эллай ӄонӄал валг’ык эняечегиӈык, меӈиныйик нэйичинэв’ г’уемтэв’илг’у тит Камчатский крайиӈӄо партияӈӄо «Ыннэн валг’ын Россия» ныг’иннэв’ эняечегиӈык льгичейпыйиг’илгык. Ӄайлём, гыммо мэлу нэлӈыгым, тыготгыманӈывоӈ вэтатык, тит метг’аӈ нэюнэтикынэв’ юнэтылг’у Камчаткак»,- иви виде-в’аняванма И. Яровая.

Омакальг’анма наполомтэлын в’аняватгиӈын инэллэчг’ин Камчатский иччетин партиякэн « Ыннэн валг’ын Россия» В. Сивак, нэкминэв’ акметгиӈо ӄонӄал валг’эн эняечегиӈэн. Ӈынвычгаё тав’аӈлай инейичик- 25 тысячав’ 712 г’уемтэв’илг’у, яллай 11 %. 2016 гэвэгиӈык эллай эняечегиӈык 8%.

«Электронный явэнаӈэпыӈ эняечелай мыкыӈ 8 тысячав’ г’уемтэв’илг’у. Г’ояӈ валг’ык эняечегиӈык эллай ӄымэк 17 тысячав’ г’уемтэв’илг’у. «Ыннэн валг’ын Россия» инеткин партиян, меӈинынэк кончоччымав’ӈынэн калив’, тит ваята ӄонӄал нэнг’ыйичинэв’ кандидато», - эвыӈ В. Сивак.

Ынняӄ калив’ кандидатэн нэегитэӈнэв’ XX Ымроссиякэн партийный майӈыумэкэтык. Ынно ягалаӈ майӈыв’уйвык Москва 19 алайиг’илгык.

Эняннимэв’нэн С. Тынанто.