Дмитрийнак Демешинынак йиллэнин омакальг’атгиӈын пыӈлойпыӈ миӈкые валг’о катгогиӈо келлаӈ юнэтылг’ин айгытӄыӈӄал Камчатский крайик

Дмитрийнак Демешинынак йиллэнин омакальг’атгиӈын пыӈлойпыӈ миӈкые валг’о катгогиӈо келлаӈ юнэтылг’ин айгытӄыӈӄал Камчатский крайик

10.06.2021 08:19:21 (GMT+12)

Дмитрийнак Демешинынак йиллэнин омакальг’атгиӈын пыӈлойпыӈ миӈкые валг’о катгогиӈо келлаӈ юнэтылг’ин айгытӄыӈӄал Камчатский крайик
Эналлагиӈэпыӈ инингивэ Генеральный прокурорэн РФ Д. Демешинынак галай омакальг’атгиӈын пыӈлойпыӈ, миӈкые валг’о катгогиӈо келлаӈ юнэтылг’ин айгытӄыӈӄал крайик.

В’утку эллай инэллэчг’ын крайик В. Солодов, итылг’ын прокуроро крайик Д. Рычагов, инавийиӈылг’ын катгогиӈэпыӈ айгытӄываятэн Р. Долган, инэллэчг’у краевой министерствакенав’.

В’аняванма, эв’лай, тит йиплэпавык айгытӄыӈӄалкенав’ ёнатгиӈо, то яйтаӈык айгытӄываятэн ёнатгиӈо, ковэталаӈ государственный тайкыёлӄыло, гэмгэтгивик пылв’ынтогиӈо келлаӈ мыкыӈ 350 млн пылв’ынто.

Тилилг’у вэтгиӈо в’эннялай явийиӈкы катгогиӈо юнэтылг’ин айгытӄыӈӄал энанмалав’гиӈэпыӈ, яялг’атгиӈэпыӈ, чинин нутэкъйит, социальный в’эннятгиӈэпыӈ.
Еппы ӈынвыӄ пыӈлов’ уйӈэ атанвэтгыӈка наколӈыӈвоӈнав’.

Инингив’ Генеральный прокурорэн РФ эвыӈ, ынаныӈ валг’о аӄайпыгиӈо келлаӈ Алеутский муниципальный то Корякский округэн, ниччыӄинэв’ ёг’ыгиӈо в’уйвыкинэв’, ныгычголӄэнав’ вэлатгиӈо пичгыкъйит, ӄив’в’айинав’ йиг’это.

Котвалаӈ эняччыгиӈо йиннялгытавык петыяяӈӄо Тигильский (82), Олюторский (47), Пенжинский (29) районык то Алеутский муниципальный округык (6), эплитэйкыкэ наконтыӈвоӈнав’ ремонтакенав’ вэтгиӈо. Уйӈэ энтуйтывэткэ коммунальный явэнаӈо, уйӈэ эвилэткэ ачыӈъятгиӈо коммунальный этгиӈыкъет то ӄуччев’.

Тит элэк йиччык ыннею аӄайпыгиӈо, ганчоччымав’лэнав’ тайкыёлӄыло. Д. Демешинынак йилнин тайкыён прокуратураӈ крайик амъел йичичг’этык яёг’ыӈгиӈо государственный то муниципальный тайкыёлӄылэн, миӈкые накояваӈвоӈнав’ бюджетный пылв’ынто, гитэк миӈкые валг’о катгогиӈо айгытӄываятэн келлаӈ ынныӈийтыгиӈэпыӈ, то миӈкые валг’о тайкыёв’ в’уткекьйит накакменӈывоӈнав’ краевой инэллэчг’э то комиссията ынныӈийтыгиӈэпыӈ.

Ив’нин Инэллаэччатыӈ крайик йинчоччымавык тайкыёлӄыло, тит ныг’итикынэв’ льготав’ кыннятав’ъякэнав’ айгытӄываятыӈ айгытӄыӈӄал то ымыӈ регионык. То мэлинг’э пылиткук вэтгиӈо региональный законодательствакенав’ йиплэпавык то йингычголавык айгытӄыӄояв’ъепгиӈэн. Омакаӈ инэллэиччетылв’ынык йичичг’этык ӈайӄытвано, то йинтыватгиӈо мимлыев’в’эв’.

Эначгыпавэ С. Тынанто.
Дни рождения в этом месяце
Парламентская ассоциация «Дальний Восток и Забайкалье»