Дмитрий Демешин лайвыма Камчаткайтыӈ, йитг’этвылӈэти омакаӈ юнэтылг’ык в’уйвык Палана

Дмитрий Демешин лайвыма Камчаткайтыӈ, йитг’этвылӈэти омакаӈ юнэтылг’ык в’уйвык Палана

10.06.2021 08:16:04 (GMT+12)

Дмитрий Демешин лайвыма Камчаткайтыӈ, йитг’этвылӈэти омакаӈ юнэтылг’ык в’уйвык Палана
Инингив’ Генеральный прокурорэн РФ Дмитрий Демешин, лайвыма Камчаткайтыӈ йитг’этвылӈэти омакаӈ юнэтылг’ык в’уйвык Палана, ӄуччев’ пыӈлоткогиӈо эллай видео-в’аняватгиӈэпыӈ.

Йитг’атвылӈыма опта эллай инэллэчг’ын крайик В. Солодов, итылг’ын прокуроро регионык Д. Рычагов, инэллэчг’у муниципалитетыӈӄо.

Мыкыӈ пыӈлов’ натвынав’ йиг’этыкъет, мыев’ ӄэв’в’аӈ накочаӈмекчеӈвонав’, йинув’таматыкъет ягэӈкэнав’ вано, то вийиӈыкъйит катгогиӈо яялг’атгиӈыкэнав’ г’уемтэв’илг’ин.

Ӄутиныйик натвынав’ пыӈлов’ мыев’ инэллэчг’э уйӈэ аяёг’ыӈка тайкыёлӄыло,тит йиннялгытавык петыяяӈӄо,  чиматылг’ыкъйит явенаӈыкъет елку мыкпыкъялг’ыяянаӄок, то эплинчичг’эткэ вэтгиӈо краевой Фондата ремонтакенав’ вэтгиӈо иччетылв’ынэ, меӈию ковэталаӈ йиплэпавык яяв’.

Юнэтылг’ын Паланык, итылг’ын ӈуйлиг’у 2 группакен, эвыӈ юлэӄ ынык як уйӈэ аныплэпав’ка мимлыев’экэн явэнаӈ.

Мыккымиӈылг’ын ылла 4 кымиӈылг’ын, энапӈылавэ, мыев’ уйӈэ еӄэ инэллэчг’у эв’иннеткэ, тит йиннялгытавык малъяяйтыӈ.

Юнэтылг’э Тэличчак тывынэн пыӈыл, мыев’ уйӈэ иткэ аякальг’атгиӈо социальный вагэӈкы.

Тигилилг’э натвыгаг’ын аӄайпыгиӈын, мыев’ актыка ымоӈ гайматылг’о ныгалайкынав’ спортакен ванэтыӈ муниципальный иччетин культуракэн.

Опта в’анявалай мимлыкъйит, мыев’ эплитэйкыкэ нэнтыгэг’ын эмлыӈтованы, меӈин наӈвогаг’ын 2006 гэвэгиӈык.

Мыев’ ӈынвыӄ пыӈлов’ эллай таяӈгиӈыкъет тайкыёлӄылэпыӈ йиннялгытавык петыяяӈӄо, то тэйкык то гыннитык коммунальный вано, йитг’атвылӈыма инингивэ Генеральный прокурорэн Россиякен тывынэн тыттэль ӄив’айинав’ вэтгиӈо инэллэиччетин крайик таяӈгиӈэпыӈ то яялг’атгиӈэпыӈ крайик.

Айӈавытколай 12 г’уемтэв’илг’у Тигильский, Олюторский, Соболевский то Пенжинский районыӈӄо. Гамгав’аняватгиӈэпыӈ Д. Демешинынак йилнин тайкыёв’ то чинин енчичг’этикынин, миӈкые инэллэчг’э наяныплэпавэкынав’ аӄайпыгиӈо.

Эначгыпавэ С. Тынанто.
Дни рождения в этом месяце
Парламентская ассоциация «Дальний Восток и Забайкалье»