Вэтгиӈо йинув’тамавык елькучыку калэяк искусствакэн Паланык ӄымэк нэкуплиткуӈнэв’

Вэтгиӈо йинув’тамавык елькучыку калэяк искусствакэн Паланык ӄымэк нэкуплиткуӈнэв’

30.04.2021 08:14:34 (GMT+12)

Вэтгиӈо йинув’тамавык елькучыку калэяк искусствакэн Паланык ӄымэк нэкуплиткуӈнэв’
Паланык итти инингив’ инэллэчг’ин культуракэн. В. Пегуровынак тилинин иччету, меӈию келлаӈ министерствак культурак. Яноткенав’ этгиӈо лэйвыкинэв’ ныг’аллай йичечг’атгиӈо, миӈкые нэкутэйкыӈын ягэӈкэн ваны Корякский калэякэн искусствакэн нынылг’этылг’ын Д. Б. Кобалевскиен то йитг’этвылӈэтык юнэтылг’ык Ӄычг’этык.

Инингивэ инэллэчг’ин культуракэн гитэнин чоччымав’гиӈо ӈывок вэтатык калэян искусствакэн. Елкукинэв’ вэтгиӈо нэтэйкынэв’ 70%. Опта елкук нэтэйкынэв’ омыльг’аткэнав’ явэнаӈо, мимлыев’в’эн, аякальг’атгиӈын. Пылиткук ымыӈ вэтгиӈо, наяӈвоӈын йиплэпавык етӄыет то наянув’таманӈын ягэӈкэн ваны калэякэн. Эчги омакаӈ вэтатылг’ык в’утин калэяк ымыӈ ею накончоччымав’ӈынав’, тит пылиткук вэтгиӈо.

«Лайвыма Паланэтыӈ, мыччог’ынав’ 5 иччету культуракэнав’ итылг’у Паланык. Яноткэн этгиӈын итти гитэк Корякский калэян искусствакэн то йитг’этвылӈэтык юнэтылг’ык, тит танвэтгыӈкы пыӈлов’ культуракэнав’. Эчги накунмитг’атванӈын калэягэӈкэн ваны, ӄымэк нэкуплиткуӈнэв’ елкукинэв’ вэтгиӈо. Мытъёг’ынав’ культуракэнав’ иччету то мыттанвэтгыӈнав’ ычгинэв’ вэтгиӈо»,- иви инингив’ инэллэчг’ин культуракэн крайик.

В. Пегуровынак ёг’ынэн Корякский округкэн музей, Корякский мылав’ъиччет «Ангт» нынылг’этылг’ын И. Жуковын, Корякский гынун ваяткэн вэтгиӈэпыӈ. Вэтатылг’а натвынав’ вэтгиӈо ыйик иччетин. Инингив’ инэллэчг’ин культуракэн опта вачче Корякский библиотекак нынылг’этылг’ын К. Кеккетинын. В’утку вэтгыльг’алай, тит йинтуйтывитвэвык библиотекан имы яӄэпыӈ.

В’уткекьйит панэнатвылай эначгыпавылг’о инэллэчг’ин то Инэллэиччетин крайик.

Эначгыпавэ С. Тынанто.
Дни рождения в этом месяце
Парламентская ассоциация «Дальний Восток и Забайкалье»