В. Солодов: Ымоӈ районо начоччымав’нав’, ӈэвэӄ йитыӈ эмлатгиӈын

В. Солодов: Ымоӈ районо начоччымав’нав’, ӈэвэӄ йитыӈ эмлатгиӈын

28.04.2021 08:16:28 (GMT+12)

В. Солодов: Ымоӈ районо начоччымав’нав’, ӈэвэӄ йитыӈ эмлатгиӈын
Яноткэнано итти пыӈыл эмлатгиӈыкъет инэллэчг’ин крайик омакаӈ инэллэчг’ык муниципальный иччетылв’ынык.

В’уткекьйит в’аняватэ инэллэчг’ын умкылв’ынэпыӈ то экологиякэн А. Кумарьков.

«Титэ яӈвоӈ тылгык г’ылг’ыл, яӈволаӈ имлэтык в’эему, йиг’это, вано ЖКХ, ягэӈкэнав’ вано в’уйвык: Аяӈкэн, Яёлкагиӈык (Пенжинский районык),Усть-Большерецкак (Усть-Большерецкий районык), Соболево (Соболевский район). Ӈэвэӄ емуӄэтыӈ, этг’у ван йимлэтыӈ»,- эвыӈ А. Кумарьков.

Гидрометеогынуныӈӄо кев’лаӈ, в’эмык Усть-Большерецкий, Соболевский районык то в’эемык Камчатка мимил когычголатыӈ 3-14 см/сут. В’эмык Тигильский районык то в’эемык Оклан (Пенжинский район) амъел кучиматчийиӈ иктыг’ит. В’уткекъйит в’эемык Тигиль чеймык в’уйвык Тигиль мимыл гычголатэ 20 сантимераӈ.

Инэллэиччетэ миӈки накогэтаӈвоӈнав’ пыӈлов’ умкылв’ыныкъйит то экологиякэнав’ накончоччымав’ӈынав’ йичечг’атгиӈо ванэн, миӈки нэкуг’энӈынэв’ эмлатгиӈо, ыннею вэтгиӈо нэкутэйкыӈнэв’ Дальневосточный межрегиональный иччетэ Федеральный инэнчичг’этылг’э умкылв’ыно.

А. Кумарьков опта эвыӈ, миӈкые валг’о вэтгиӈо нэнг’ытилийкынэв’ инэллэчг’э гамгав’уйвык, тит иткэ ныг’итикынэв’ аӄаэтгиӈо эмланма.

Инэллэчг’э крайик В. Солодовынак йилнин тайкыён чоччымавык эмлатгиӈыӈ, то ымоӈ явытгыйик в’уйвыкинэв’ элэк йиччык г’ылг’ыл.

В’уткэкъйит панэнатвылай эначгыпавылг’о инэллэчг’ин то Инэллэиччетин Камчатский крайик.

Эначгыпавэ С. Тынанто.
Дни рождения в этом месяце
Парламентская ассоциация «Дальний Восток и Забайкалье»