Эчгыпо Камчаткакенав’ чав’чываеличг’энан 20.11.2020 г.

Эчгыпо Камчаткакенав’ чав’чываеличг’энан 20.11.2020 г.

20.11.2020 03:20:16 (GMT+12)

Эчгыпо Камчаткакенав’ чав’чываеличг’энан 20.11.2020 г.
Инэллэчг’э Камчаткак В. Солодовынак йиллэнин йитг’атвылӈыгиӈын омакаӈ юнэтылг’ык. Ынниг’ан валг’о вэтгиӈо накотайкыӈвоӈнав’ тит юнэтылг’э лиги нэнг’ылӈикынэв’ вэтгиӈо инэллэчг’ин.

Чининкинэв’ пыӈлов’ эналачг’ынаӈ юнэтылг’э натвынав’ видео- в’аняватгиӈэпыӈ. В’утку опта эллай инэллэчг’у муниципальный иччеткинэв’.

Йитг’атвылӈыма В. Солодовынак гитэнин пыӈлов’ энангыёлав’гиӈэпыӈ, энанмалав’гиӈэпыӈ, таяӈгиӈэпыӈ, тит ав’ийитг’ымкинав’ лайвыгиӈо йиг’этэпыӈ ныг’итикынэв’. Эналачг’ыныкаӈ юнэтылг’э натвынав’ эняччыгиӈо кымиӈыкйит, меӈию в’аччылылалг’о келлаӈ, то ремотакенак вэтгиӈыкъет кыннятав’ъяк нымнымык Дальний, то лэйвыкъйит йиг’этыӈӄо калэйтылг’эн.

***

Пылиткома йитг’атвылӈыгиӈо В. Солодовынак йилнин тайкыёлӄыло эналлачг’ыйикыӈ государственный инэллэиччетык Камчатский крайик.

Ыннею келлаӈ йиплэпав’гиӈо пыӈлов’ кымиӈыкъйит, меӈию в’аччылылалг’о келлаӈ, пылиткук тэйкык кыннятав’ъян нымнымык Дальний, ныкыттыг’ав’ йичичг’этык миӈкые конвэлӈыволаӈ вэтатылг’о лэйвинэӈык.

В. Солодовынак йилнин тайкыёв’ тит калэяк, ымыӈ кыннятав’ък ымын ею ӈыг’итикынэв’ тит нымэлг’эв’ нэейгучев’ӈикынэв’ кымиӈу меӈию келлаӈ в’аччылылалг’о. Тит ычгинэв’ ныг’итикынэв’ яӈъя валг’о ейгучев’ӈыкаликалу.

«Тыкоёлыӈ, миӈкые валг’о эччыгиӈо келлаӈ яйичг’ык, миӈки нэкунмэйӈэв’ӈынэв’ кымиӈу ӈуйлиг’у. Эчги актыка ийкыӈ ымыӈ ею яӈъя тэйкык, тэӄыӈ ӄутин майӈыв’увык. То эв’ынчам мыччатгымаллайкэ тит кымиӈу ӈуйлиг’у нымэлг’эв’ нэейгучев’ӈикынэв’, то ийкыӈ ныг’итикынэв’ в’эннятгиӈо. В’отэнэпыӈ мыччавэталлайкэ омакаӈ гамга инэллэчг’ык»,- эвыӈ В. Солодов.

Янотыӈ В. Солодов иви , тит вэтгиӈо инэллэчг’ин г’ояӈ ныг’итикынэв’, тит ымыӈ микнэк лиги нэнг’ылӈикынэв’ ычгинэв’ вэтгиӈо. В’отэныӈӄо опта накотайкыӈвоӈнав’ йитг’атвылӈыгиӈо омакаӈ юнэтылг’ык крайик.

Эчгыпо йинчоччымав’нэн С. Тынанто.

Эчгыпо Камчаткакенав' чав'чываеличг'энаӈ 19.11.2020 г.: https://fareastvip.ru/newswire/detail.php?ID=250654