Эчгыпо Камчаткакенав' чав'чываеличг'энаӈ 09.09.2020 г.

Эчгыпо Камчаткакенав' чав'чываеличг'энаӈ 09.09.2020 г.

09.09.2020 09:08:30 (GMT+12)

Эчгыпо Камчаткакенав' чав'чываеличг'энаӈ 09.09.2020 г.
В. Солодовынак гитэнин Олюторский районный малав'ъян то  йинв'аняваннэн в'уткекинэв' вэтатылг'о. Ынан аӈъянэн вэтгиӈо инэнмэлэвычг'ин титэ ӈывой итык аӄачыг'ычгиӈын. Янотыӈ айгытӄыӈӄал инэнмэлэвычг'у в'утин эччатыӈӄо ӈыволай вэтатык тит элэк йиччык COVID-19.

"Олюторский районный малав'ъян - ынан нымэлӄину китыӈ Камчаткак. В'утку ымыӈ ею явэнаӈо котвалаӈ, ковэталаӈ митычг'у инэнмэлэвылг'у. В'уткые коянӈыволаӈ лекаратык ымыӈ ӄутин в'ойвэпыӈ,- эвыӈ В. Солодов.- Тыкив'ӈынэв' ӄайлём вэтатылг'ыйикыӈ, меӈию гымаллай тит итке ныг'итики аӄачыг'ычгиӈын. Тыкомычв'ынатыӈ , амъел валг'о вэтгиӈо в'утин малав'ъякенав', яв'эннялайке йиплэпавык ымыӈ ею ёнатылг'ыйикыӈ Олюторский районык".

В'уччин малав'ъян ӈывой вэтатык 2007 г. Ынно китыӈ гычголкен Тэличчак, ив'тыл келлаӈ поликлиникан, ӈыччеӄ отделеният, инэнчичг'эт ваны.

"Эчгикин малав'ъян, меӈин гантывалэн титэ пылиткуй нучельӄыкин камакъятгиӈын, нымэлӄин. Уйӈэ яӄыӈ эӄлэткэ, котвалаӈ имыяӄ явэнаӈо - инэнчичг'этык, УЗИ, то кымиӈатылг'ин ванык опта кытвыль явэнаӈо котвалаӈ. Ымыӈ ею котвалаӈ тит нымэлг'эв' вэтатык",- панэнатвэ пыче итылг'ыӈ эналлачг'ынаӈ крайик инэнмэлэвылг'ын К. Григоренко.

Опта ынан тывынэн эняччыгиӈын, мыев' унмык коӄлалаӈ в'эннятычг'ыйикыӈ инэнмэлэвылг'ин.- В'ото хирургический иччетык ятан 50% ковэталаӈ, ӄуччев' уйӈэ итке. Инэллэчг'ын малав'ъякен Л. Филиппова эвыӈ, эмен 68 % в'иннетычг'у инэнмэлэвылг'ин келлаӈ чининкинэв', в'уткекинэв'. Ынняӄ ӈыёӄмыллыӈэн инэнмэлэвылг'у ӈэвэӄ экмитык,  ятан ӈыечгэйи Камчаткакенат.

"Тыкуйиг'этыӈ ивык тойкыӈ аӈъяв'аняво, мыев' гымаллатык, тит амкатка аӄачыг'ычгиӈын, то ымыльг'ыӈ туйик вэтатыкъет. Ӄайлим ынниг'ан валг'о инэнмэлэвылг'у ковэталаӈ Камчаткак тит яйтаӈык кытгемгиӈо юнэтылг'ин. Нымэйиӈӄин тойкыӈ , ӄайлём!",- эвыӈ В. Солодов.

Инэнмэлэвылг'э напӈылон, тит в'утку ныг'итики нинг'ыӄин интернет, меӈин ев'иннетики лиги лыӈык миӈкые ковэтанӈыволаӈ ӄуччев' инэнмэлэвылг'у Камчаткак то ӄутиннутэк. Инмы тойчыг'ычг'энаӈ эмет ковэталаӈ Олюторский районык. Ӈэвэк йиг'уевыӈ нинг'ыӄин интернет, в'отэныӈӄо опта этг'у яплэпавыӈ вэтгиӈын. Пыче итылг'ын инэллэчг'ын крайик эвыӈ, ыннин пыӈыл йинтыванэн Президентаӈ РФ. Китыӈ тайкыён, тит тэйкык нив'лыӄин г'элилӈын Тэличчайтыӈ 2023 г.

Эчгыпо йинчоччымав'нэн С. Тынанто.Эчгыпо Камчаткакенав' чав'чываеличг'энаӈ 08.09.2020 г.: https://fareastvip.ru/newswire/detail.php?ID=250480