Эчгыпо Камчаткакенав' чав'чываеличг'энаӈ 07.09.2020 г.

Эчгыпо Камчаткакенав' чав'чываеличг'энаӈ 07.09.2020 г.

07.09.2020 08:35:17 (GMT+12)

Эчгыпо Камчаткакенав' чав'чываеличг'энаӈ  07.09.2020 г.
Пыче итылг'ын инэллэчг'у Камчаткак В. Солодов итти йинв'аӈатгиӈык "Елизовский ӈэйӈэй" районный гынунык. В'аняванма ынно эвыӈ, в'утин гивик ыннин ангыт китыӈ 34.

"Ӄонпыӈ ынкыяпыӈӄо ванык Русь ыннею ярмаркав' келлаӈ нымэйиӈӄинэв' этгиӈо муйик ёнатгиӈык. В'утку эмэлкэ куйик чининкинэв' пичгу, ынанмитг'айинав', нымэлӄинэв'. Ыннин китыӈ ангыт, миӈки ымыӈ койитг'атвылӈыӈволаӈ. Эчги мыткоӈволаӈ паненячг'энаӈ юнэтык, мыев' мытэмӈоламык ӈэвэӄ экмитык ватӄыльг'энав' йиг'илгу. Ӄонпыӈ гамгачг'ыло ымыӈ ею нымэлӄинэв' нытикынэв' ",- эвыӈ В. Солодов.

Пыче итылг'э инэллэчг'у крайик тилинин г'элилӈыйичг'у инэнвилиткувылг'ин, кычвильг'эти омакаӈ юнэтылг'ык, куйнин имыяӄ пичгу. В'утин гивик "Елизовский ӈэйӈэйик" эллай мыкыӈ 350 г'уемтэв'илг'у. Эв'лыгиӈын инэнвилиткувылг'ин г'элилӈин - 1 км. В'утку имы ею нэнвилиткув'нэв' - тыӈэчг'у, кинуӈвав', молокпичгу, пыг'онав', ывынг'у то ӄуччев'. Опта эллай йинвилиткувык камчаткакенав' митг'алӄылу, в'аӈэгиӈо.

*

Тэйкык амъел вэтгиӈо краевой малав'ъяк гымлэ наӈвонав'. Эчги накончоччымав'ӈын йилык ваны таяӈылг'ыйикыӈ.

В'утин гивик йитыӈ ыннэн таяӈъиччет, меӈин нэкулыг'уӈын. Ынан яӈвоӈнэн йилык йивиту тит нэнг'ытэйкынэв' явэнаӈо йинтыватык малав'ъян. Наяӈвоӈнав' вэтгиӈо гамга корпусык краевой малав'ъяк.

В.Солодовынак,ӈывома итык пыче итылг'у инэллэчг'у крайик , овекеӈ йинтыванэн тайкыён тит кытаваӈ лыг'ук пылв'ынто пылиткук тэйкык юлэӄ йинтыватылг'ын малав'ъян. Тит пылиткук виткукинэв' вэтгиӈо малав'ъяк, коӄлалаӈ янот ӄымек 8,4 млрд то 4, 6 млрд ӈывок ӈыеӄэв'кин. Пыче итылг'э инэллэчг'э Камчаткак в'аӈланэн в'эннятгиӈо Президентан Россиякен. В. В. Путинынак йилнин тайкыёлӄыл эналлаэччатыӈ Россияк. То еӄӄэ яӄам   инэллэчг'ын Инэллэиччетык РФ М. Мишустин то инэллэчг'ын энанмалав'гиӈэпыӈ М. Мурашко итгыг'и краевой малав'ъяк то ӈанко эв'лай, эмен ятвалайкэ пылв'ынто пылиткук нытуйӄин краевой малав'ъян. Правительствата РФ нэлэг'унэв' этгиӈо, меӈӄо нэекминӈынэв' пылв'ынто.

Эчгыпо йинчоччымав'нэн С. Тынанто.Эчгыпо Камчаткакенав' чав'чываеличг'энаӈ 04.09.2020 г.: https://fareastvip.ru/newswire/detail.php?ID=250470
Дни рождения в этом месяце
Парламентская ассоциация «Дальний Восток и Забайкалье»
Far East: Who is Who