Эчгыпо Камчаткакенав' чав'чываеличг'энаӈ 31.07.2020 г.

Эчгыпо Камчаткакенав' чав'чываеличг'энаӈ 31.07.2020 г.

31.07.2020 09:17:38 (GMT+12)

Эчгыпо Камчаткакенав' чав'чываеличг'энаӈ 31.07.2020 г.
Яйичг'эччатыӈ айгытӄываятэн Камчаткак эллай государственный пылв'ынтыв'эннятгиӈо. Ымоӈ нэйилнэв' мыллыӈэн миллионав'. Ыннею пылв'ынто кенӈыволаӈ, тит айгытӄылг'а нанг'ыяйтаӈэкынав' то нанг'ынгычголавэкынав' чининваяткэнав' ёнатгиӈо.

В'эннятгиӈо нэйилнэв' бюджетэтыӈ 11 муниципальный эччатылв'ыныӈ то городской округэтыӈ, мыев' келлаӈ такалэӈгиӈо омакаӈ вэтатык инэллэиччетык энаплэпав'гиӈэпыӈ Камчаткан, тит амъел ныг'итикынэв' в'энгятгиӈо яйичг'ыэччатыӈ айгытӄываятэн юнэтылг'ин чининнутэк.

"Пылв'ынты в'эннятгиӈо кенӈыволаӈ тит ныплэпг'ав' ныг'ытвайкынав' яйичг'ыиччету айгытӄылг'эн то янг'ав' ычгынан нанг'ыявайкынав' тэйкык чининваяткэнав' вэтгиӈо. Ыннею келлаӈ: ынныӈийтыгиӈо, тагийниӈгиӈо, ечегиӈо юлг'ыюлг'у тыӈэчг'у, ӄоягыннетгиӈо, в'аӈэгиӈо то тэминьӈыгиӈо",- эв'лай краевой инэллэиччетык энаплэпав'гиӈэпыӈ Камчаткан.

"Мую ӄонпыӈ мыткев'ӈыволаӈ тит омакаӈ навэтатэкынав' айгытӄыиччетылв'ыно то инэллэиччету гамга в'уйвыкинэв'. Мыев' яйичг'ыиччету чаймыӈ коёналаӈ ванык, миӈки келлаӈ этонотав', чининкинэв' ёнатвано айгытӄылг'эн. Ычгынан накойяйтаӈывоӈнав' то намкумг'ыг'ав' наков'ъепӈывоӈнав' чининваяткэнав' нучельӄу. Омакаӈ итылг'у вэтгиӈо ков'эннянӈыволаӈ йингычголавык культуракенав' этгиӈо, социально-экономикакенав' акметгиӈо" - эвыӈ пыче итылг'ын инэллэчг'у миӈки энаплэпав'гиӈо Камчаткакенав' накотайкыӈвоӈнав'.

*

Майӈыынныӈийтыиччето то айгытӄываятэн ынныӈийтыгиӈо гымлэӈ наӈвонав' 30 алайиг'илгык Камчаткакен эмылпоӄыткынык то в'эемык Камчатка. То 3-5 ӄайчейпыйилгык пыче нэтэйкынэв' энанг'отав'гиӈо ынныӈийтык. Ынниг'ан валг'о тайкыёв' нэкминэв' вэтатъиччетэ, миӈки накогэтаӈвоӈнав' ынныакметгиӈо Камчатский крайик.

Ваӈлалай ӈывок гымлэӈ ынныӈийтык эччатыӈӄо энныӈийтыгиӈэпыӈ Усть-Камчатский районыӈӄо.

Опта нэтэйкынэв' г'ылв'ыёв' титэ пыче кытыл анныӈийтыка эмылпоӄыткынык Корфык то гынун мимлванык, меӈию коӈтолаӈ эмылпоӄыткынэтыӈ Олюторский то Корфан. Ыннею энанг'отав'тав'гиӈо келлаӈ тит ынну нагалайкынав' ваямэтыӈ.

Эчгыпо йинчоччымав'нэн С. Тынанто.


Эчгыпо Камчаткакенав' чав'чываеличг'энаӈ 30.07.2020: https://fareastvip.ru/newswire/detail.php?ID=250284
На полшага впереди

02.08.2020 11:29:43 (GMT+12)

На полшага впереди